Shillong, Naiwieng 28: U Myntri Rangbah ka Jylla Conrad K Sangma ha ka sngi Thohdieng ula pynbna ba un pyllait noh ïa ka instalment ka-ba ar jong ka post matric scholarship ha ka 29 tarik Naiwieng sha ki samla pule ka Jylla.
Ula pyntip ruh ba kan shimpor kumba 2-3 sngi ha ki sngi long trei ba kane ka pisa kan paw ha ka account jong ki samla pule.
Katkum ka jingong jong u, palat 70,000 ngut ki samla pule kin ïoh ïa kane ka scholarship kaba jan kot T.130 klur.
“Kumba la kular sha phi baroh ba mynta u snem, ngan shimkhia ban pynthikna ba ka pisa scholarship la pyllait ha shuwa ka Khristmas, kumta ngan leh ïa kata,” ula ong. U Myntri Rangbah ula pynpaw ba kane kan ïarap bha ïa ki samla pule ha kiba bun ki liang haba kitbok kit rwiang ruh ïa baroh na ka bynta ka lawei.
