Shillong, Ïaiong 15: U MP ka Rajya Sabha Rakesh Sinha hynnin ka sngi palei ula pynbna ïa ka rai ban ting biang sa lai tylli ki Shnong jong ka Jylla Meghalaya.
“Nga la rai ban ting sa ïa ka Mawmang, Mawshut bad ka shnong Sder” ong u Rakesh Sinha haba ïakren bad ki nong thoh khubor haba pyntip ba ïa kane ka rai la shim hadien ba ki nongïalam jong kine ki shnong kila wan ïakynduhia u.
U Rakesh ula pyntip ba kine ki Shnong haduh mynta ki dei ki bym pat lait surok bad ki briew kin hap ban ïaid haduh lai ne lai kynta na Kongthong ban poi sha kine ki Shnong.
“Ngan sa leit sha kine ki shnong ban ïakynduh ïa ki briew” ong une u MP haba pyntip ba un sa buh ruh ïa ka virtual clinic ha kine ki lai tylli ki Shnong hashuwa ban kut jong u bnai ban wan.
U Sinha u pyntip ba ka Deputy Commissioner kan sa leit iuhkjat ha Kongthong ha ka 16 tarik Ïaiong lem bad ki Ophisar jong ki tnad bapher bapher ban leh eiei na ka bynta ka jingeh jong ki paidbah.
Lah ban kdew hangne ba une u MP ula ting ïa ka shnong Kongthong ha u snem 2019 bad hapoh ka jingkhmih jong u, ka shnong kala ïoh haduh 200 tylli ki jaka theh niut, ka machine shna sanitary pad bad hynriew tyli ki paiñ khana paidbah.
U Rakesh ula sam ruh ïa palat 400 tylli ki synduk ri ngap bad ki tiar ki tar sha ki nongshongshnong ha ka sngi balang.
Ban nang kyntiew ïa kane ka Shnong bad ïa ka jingitynnad ka sawdong sawkun, une u MP ula pyntip ba un sa khot ïa ki Nongpynmih phlim Bollywood ba kin ring phlim ha ka shnong Kongthong.
