New Delhi, Nailar 21: U Head Coach ba dang shu shah thung thymmai jong ka kynhun phutbol bar ri ka India, u Manolo Marquez u la pynbna ïa ka thup kyrteng jong ki 26 ngut ki player kiba lah ban mih madan ïa ka ri na ka bynta ka jingpynkhreh jong ka India ïa ki jingïakhun Intercontinental Cup, ka lympung na bynta lai tylli ki ri, ka kamram kaba nyngkong ïa u kum u Coach ha kane ka lympung ka ban long ha Hyderabad naduh ka 3 tarik u Nailur haduh ka 9 tarik u Nailur.
“Ngi sngew kyndeh ban sdang kilanmet kum ka jingpynkhreh kaba nyngkong bad Nga tip ba kan long kumjuh ïa ki rangïalehkai. Ngin ïakynduh ïa ar tylli ki kynhun ba ïapher bad ka kyrdan kam long kaba kongsan. Ngi donkam ban ïatreilang ha kajuh ka lynti ban shem ïa ka kynhun player kaba biang bad ïa ka jinglong jingman jong ki khnang ba kan long kaba ïaid beit, kane ka long kaei kaei kaba Nga sngewthikna. Nga tip ba baroh Ngi don hapdeng ka samoi kaba ngi shem ïa ki jingïakhun kiba itynnat hakhmat jong Ngi. Ka long ka burom kaba khraw ban phong ïa ka sopti jong ka ri (National Team) bad Ngi donkam ban pyni sha baroh ki nongkyrshan,” la ong u Manolo lyngba ka aiff.com
Ka Syria, kaba don ha ka kyrdan ba 93 ha ka thup kyrdan jong ka FIFA ba dang shen, bad ka Mauritius, kaba don ha ka kyrdan ba 179, ka dei kawei pat ka kynhun ka ban ïakhun ha kane ka lympung. Katba ka India ka don mynta ha ka kyrdan ba 124. Ha kaba ïadei bad kane ka lympung, ka India kan sdang ïa ka jingpynkhreh kan sdang naduh 31 tarik mynta u Nailar ha Hyderabad.
Kane kan long ka jingïalehkai kaba nyngkong ïa ka India naduh ba ka la mad ïa ka rem kaba kthang ha ka Qatar ha u Jylliew ha kaba ka kynhun lehkai jong ka ri ka la khyllem noh na ka FIFA World Cup Qualifiers bud sa ka jingshah sloit noh jong u Coach ka kynhun, u Igor Stimac.
Ka thup kyrteng ki 26-ngut ki player ki long:
Goalkeepers: Gurpreet Singh, Amrinder Singh, Prabhsukhan Singh Gill.
Defenders: Nikhil Poojary, Rahul Bheke, Chinglensana Singh Konsham, Roshan Singh Naorem, Anwar Ali, Jay Gupta, Ashish Rai, Subhasish Bose, Mehtab Singh.
Midfielders: Suresh Singh Wangjam, Jeakson Singh, Nandhakumar Sekar, Naorem Mahesh Singh, Yasir Mohammad, Lalengmawia Ralte, Anirudh Thapa, Sahal Abdul Samad, Lallianzuala Chhangte, Lalthathanga Khawlhring.
Forwards: Kiyan Nassiri Giri, Edmund Lalrindika, Manvir Singh, Liston Colaco.
