Khliehriat, Nailar, 17: Ka ophis jong u District Planning Officer, East Jaiñtia Hills District ka la pynbna paidbah ba ka North East Zone Cultural Centre (NEZCC), Ministry of Culture, Sorkar India ka khot aplikeshon ïa ki samla sap na ka bynta ka khusnam Young Talent Artistes Award na ka bynta u snem 2023-24, 2024-25 & 2025-26. Kiba aplai ki dei kiba don sap ha ka shad tynrai, ka rwai tynrai (Folk & Tribal Music/Song & Dance) kiba ïaleh skit ne Theatre, kiba leh drama, Mime, dro dur ba ai rong, kiba nang ban shna jingshna da ki siej (Wood, Cane & Bamboo Craft Traditional Handloom & Handicrafts, Pottery) bad kiwei kiwei ki sap ba ki don.
Ki samla don sap kiba lah ban aplai ki dei kiba hapoh 18 snem haduh 30 snem bad ki dei ban long ki nongshong shnong jong ka ri India bad ki riewlum na ka jylla Arunachal Pradesh, Assam, Manipur, Meghalaya, Mizoram, Nagaland, Sikkim &Tripura bad kiba aplai ne ki Candidate kiba la ïohteng ïa ki khusnam ha ka State/National kim lah shuh ban aplai ïa kane ka khusnam ne ka skim.
Ka khusnam ka long da ka song pisa kaba T. 20,000.
Kino kino ki samla kiba don jingmut ki lah ban aplai beit sha ka tnat Directorate of Arts & Culture, Sorkar Meghalaya lyngba ka email: artsandculturedepartment
@gmail.com kata ha lane shwa ka 18 tarik, Nailar, 2025.
