Jowai, Nailar 06 : U Deputy Commissioner ka West Jaiñtia Hills District ula pyntip paidbah ba ka sorkar jylla lyngba ka National Highways and Infrastructure Development Corporation Limited (NHIDCL), ka donkam jaka ban shna ïa u surok 4- Lane Greenfield Alignment (High-Speed Corridor) uba ïaid lyngba ki shnong kiba hap hapoh ka West Jaiñtia Hills District:
Kine ki shnong ki kynthup ïa ka Saw Shnong – (Larnai,Thadmusem,Sohphoh and Nongkhroh), Larnai, Thadmusem, Sohphoh, Kdohkule, Wahiajer, Mukhla, Umlangshor, Mukhla Sohshrieh, Mukhla Nongrim, Mookaswan, Nongbah, Pasyih bad Thadmuthlong.
Na ka liang u DC ula pyntip kino kino ki jingtei thymmai kiba hap hapoh kitei ki jaka ban ïaid u surok 4-Lane ki dei ban ïoh jingbit shwa na ka ophis treikam jong u.
U la ong ruh kino kino ki jingtei lada ki dei kiba shipor ne kiba pura kiba shna khlem da ïoh jingbit wat hadien ba la dep ban ai jingpynbna, kin nym ïoh shuh ïa ka bai lutksan haka por ban pyntrei ïa kane ka project shna shurok bad kane kan treikam ha baroh ki jaka jong ki riew shimet ne ki jaka khaïi.
La pyntip ba kane ka hukum kan treikam noh mardor naduh bala pynbna paidbah ïa ka.
