Pynbna u DC ka East Jaiñtia Hills ïa ka rally ‘Agnipath Scheme’ ban thep kam shipai

Khliehriat, Naitung 23: U Deputy Commissioner ka East Jaiñtia Hills District, u pynbna paidbah ba ka tnat shipai ka Indian Army ka khot application na ka bynta ki candidate kiba biang (shynrang) ki ban rung sha ka kam shipai kaba lyngba ka rally kaba hapoh ka skim jong ka Agnipath Scheme, ka jingthep application kan sdang naduh ka 27 tarik u nailur 2022 bad kan kut haduh ka 10 tarik u risaw 2022 kaba na ka bynta baroh ki disrict jong ka jylla Meghalaya bad ki saw tylli ki district jong ka Assam (Nagaon, Sonitpur, Bishwanath & Morigaon).
La ong ruh ba ïa kane ka rally sha ka kam shipai lane ka Army Recruitment Rally yn pynlong ha Manekshaw Stadium, 58 GTC, Happy Valley, Shillong, Meghalaya.
Ka tarik ban shim ïa ka registration ka la sdang naduh ka 5 tarik u naitung bad kan kut haduh ka 3 tarik u nailar 2022, ki nongthep lane ki candidate kiba kwah ban aplai ïa kane ka kam shipai kin long ha ka thup jong ki Agniveer (General Duty) (All Arms), Agniveer (Technical) (All Arms), Agniveer (Clerk /Store Keeper Technical) (All Arms), Agniveer (Tradesmen) kin dei kiba la pass ïa ka kyrdan ba shiphew (10th Pass), (All Arms) bad Agniveer (Tradesmen) (All Arms), ki dei ban pass ïa ka kyrdang ba phra ( 8th Pass).
Katkum ka jingpynbna (notification) la bthah ba ki nong aplai ki dei ban aplai tang ïa kawei ka kam bad lada lap ba ki aplai ne register bun tylli ki aplication kin shah kyntait noh (disqualify).
La ong ba kiba aplai ki lah ban aplai online (Join India Army Website(http://joinindianarmy.nic.in).
Ïa ki Admit Card na ka bynta kane ka rally thep kam shipai, yn phah lyngba ki email ha ka 25 tarik u nailar bad ki nong aplai kin sei ia ki Admit Card na ka email ba ki lah dep register bad yn shah ïa ki candidate kiba don ïa ka admit card ba kin leit sha katei ka rally, la ong ruh ba lada don ki nong aplai ne ki candidate ki bym ïoh ïa ki admit card kata san sngi shwa katei ka rally, ki lah ban leit mih sha RO (HQ), Shillong ban ïoh ki jingshai.
Ki candidate ki dei ban poi sha ka jaka ba long raly ha ka por kumba la batai ha ki Admit card, namar ynda la khang ïa ka khyrdop (gate) yn nym shah shuh ban rung bad na ka bynta ki jingtip ba kham bniah ki candidate ki lah ban leit kylli na kino kino ki ARO kiba don hajan bad ki jingbatai lah ruh ban ïoh na ka website www.joinindianarmy.nic.in.