Khliehriat, Nailar 19: U Deputy Commissioner, East Jaiñtia Hills District, ha ka jingpyllait khubor myn ha kine ki khyndiat sngi ba la leit u la pynbna paidbah ïa ki kyndon lane ki Guideline ba la pynllait na ka ophis jong u Lat ka jylla kaba dei halor ki kyndon ban ïada ïa ki um ki wah bad ban pynneh pynsah ïa ki tyllong um ba la tip ruh kum ka Meghalaya Waterbodies (Preservation and Conservation) Guidelines, 2023, ki kyndon ki dei ruh na ka bynta jong baroh ki paidbah jong ka jylla.
Katkum ki jingbthah lane ki Guideline, la mana ban bert ñiut pathar ha ki um ki wah, kumjuh ruh la mana ban pyllait ne pyntuid ïa ki um jakhlia na ki ïing ki sem bad na ki karkhana sha ki wah bad sha kino kino ki tyllong um, namar ka jingpyntuid um jakhlia kan ktah bad pynsniew ïa ki um ki wah, la bthah ruh ba ymbit ïano ïano ban pynwit ne tuklar ïa ki kam ki jam ba pyntrei da ki bor ba halor lane kino kino ki Agency ha kaba iadei bad kino kino ki kam ban ïada bad ban pynneh ïa ki um ki wah.
La mana pyrshah ban ym bit ban leh kano kano ka kam ban tih bad ban khlong ïa ki mar pohkyndew hajan ki um ki wah khlem da ïoh jingbit na ki bor kiba halor, la khang pyrshah ruh ban pyndonkam ïa ki um ki wah na ka bynta ban khwai dohka ha kaba khaiï ne die ïa ki dohkha, kumjuh ruh la khang pyrshah ban pynlong ïa ki um ki wah kum ki jaka ri dohkha (aquaculture), namar kane kan ktah ïa ka jinglong kyrpang ka mariang lane kata ka natural ecosystem.
La mana ruh ban shna ïa kino kino ki jait jingshna bad ki jingtei ha ki um ki wah.
