Pynbna u CM 100 klur ïa ki Police Station, 300 klur ïa ki jaka sumar

Shillong, Lber 31 : Ka sorkar jylla ka la pynkhreh ban pynlut haduh kumba 100 klur tyngka na ka bynta ban pynbha ïa ki ktem pulit ne police station kiba don ha kylleng ki bynta jong ka jylla bad kumba 350 klur pat na ka bynta ki jaka sumar kiba don ha ka jylla.
Haba kren ha kane ka sngi Palei, u Myntri Rangbah, Conrad K Sangma u la ong, “Kumba phi tip hi, ki don bun ki police station kiba la duh ne jot kumta ngi la mang kumba 100 klur na ka bynta ban pynbha ïa ki.”
Nalorkata, u la ong ruh ba kin mang kumba 300 klur na ka bynta ban pynbha ïa ki jaka sumar kiba don ha ka jylla kynthup naduh ki CHC, ki PHC bad sub centre.
U Myntri Rangbah u la ong ruh ba ka sorkar jylla kan theh pisa shibun na ka bynta ban pynjanai shuh shuh ïa ki jaka teikam (administrative offices) kiba don ha kylleng jong ka jylla.
Haba kren pat halor ka snem mangtyngka ba thymmai (Financial Year) kaban sdang naduh ka sngi Thohdieng, u Myntri Rangbah u la pyntip ruh ba kin mang bun bha ka pisa na ka bynta bun ki kam pynroi kiba ïadei bad ki paidbah.
“Nga kwah ruh ban pyntip ïaphi ba ki don haduh 2,500 tylli ki skul Lower Primary jong ka sorkar bad ha kine ki saw snem ka sorkar jylla ka la pynlut palat 200 klur ban pynbha bad pynheh ïa ki skul ha palat 200 tylli ki skul. Don ki skul ba ngi pynlut 10 lak, 15 lak bad don ruh ki skul ba ngi pynlut 37 lak tyngka,” u la ong.
Shuh shuh u la ong ruh ba mynta ki pynkhreh ban kyrshan pisa ruh wat na ka bynta ban maramot ïa ki skul la ka long naduh 2lak haduh 5lak tyngka sha ki 2000 tylli ki skul sorkar ha kane ka snem treikam ba mynta kaban poi kumba palat 100 klur tyngka.
Ha kane kajuh ka sngi, u Myntri Rangbah u la pynbna ruh ba la mang 120 klur tyngka na ka bynta ban pynbha ïa kylleng ki jaka treikam jong ki Block kiba don ha baroh kawei ka jylla.