Shillong Jymmang 08: U Symbud Myntri Rangbah ka jylla u Bah Prestone Tynsong u la pynbna ba ka sorkar jylla kan tei 3 tylli ki Mini Secretariat ha Jowai, Tura bad Pynursla bad hadien kane yn sa tei shuh shuh ïa ki Mini Secretariat ha kylleng ki bynta jong ka jylla.
U Bah Prestone u la pynbna ïa katei ha ka jingplie ïa ka ïing Dorbar jong ka Dong Pynursla Proper ha ka 7 tarik mynta u bnai.
“Ngi la ïoh ïa ka bhah tyngka ban shna ïa ka Mini Secretriat ha ka jaka kaba don ka ophis jongka Civil Sub Division, yn tei ruh ia ka Circuit House bad ïa ki Quarter jongki ophisar bad ki nongtrei jongka Pynursla CSD” ong u Bah Prestone.
U la ong, shen u Myntri Rangbah ka jylla yn sa wan buh ïa u mawnongrim ban tei ïa ka Mini Secretariat ha Pynurlsa bad u la ïathuh ba ka sorkar ka la dep ban mang ïa ka pisa ban tei ïa ka Mini Secretariat ha Tura, Jowai bad Pynurlsa bad ka sorkar kan sa bteng ban shna ïa ki Mini Secretariat ha kiwei kiwei ki jaka.
Nalor kane u la ong, ka sorkar kala mang ruh ïa ka pisa ban shna thymmai noh ia ka ophis jong ki Block Development Officer (BDO) bad shen yn sa buh mawnongrim ban tei thymmai noh ïa ka ophis jong u BDO ka Pynursla.
U Bah Prestone u la ong, katba nang mih ki sngi ka thaiñ Pynursla ka la kylla kum ka sorbah bad ka la nang bun ki briew kumta ki nongïalam shnong ki dei ban pyrkhat na ka bynta ban don noh ïa ka jaka bret ñiut katkum ka juk stad kaba mynta bad u la kyntu ïa ki nongïalam shnong ba kin ai ka jingïatreilang ban ïoh ïa ka jaka bret ñiut ha Pynursla.
Ha kaba ïadei bad ka jingplie ïa ka ïing dorbar u Bah Prestone u la pynpaw ïa ka jingkyrmen ba lyngba kane ka ïing dorbar kan long ka jingmyntoi ïa ki paidbah ha kaba ki Seng Kynthei, Seng Samla ne ka Dong ki lah ban pynlong ïa ki jingïalang bad kan long ruh ka lad kaba ki nongshong shnong ki la pynlong ïa ki jingkhawai sngewbha.
Ha kane ka jingplie ïa ka ïing dorbar la ïadon lang ka Kong Grace Mary Kharpuri kum ka Kongsan Symbud, ki heh ophisar ka thaiñ ka Kong E Warjri bad u Bah G Warjri, u Rangbah Shnong ka Pynursla u Bah MS Khongthaw bad kiwei kiwei.
