Shillong, Risaw, 07: Ka Sorkar Jylla ka la pynbna ïa ka jingbhah pule doktor MBBS na ka bynta ki 93 tylli ki Seat hapoh ka bhah jong ka Central Pool na ka bynta ka samoi pule jong u snem 2025-26.
Ïa ka thup kyrteng la pyllait paidbah da ka jingtuklar jong ka Khasi Students’ Union (KSU) ha kaba ïadei bad ka jingkynnoh ba ka don ka jingbym biang ha ka rukom bhah ïa ki samla pule.
Na ki 93 seats, 14 ngut ki samla pule ki la shah pynrung ha ka Unreserved Category, 37 ngut ha ka Khasi-Jaiñtia Category, 37 ngut ha ka Garo Category bad 5 ngut ha ka OST/SC Category. Nalor kata, sa 35 ngut ki samla pule la buh ha ka Waiting List.
Katkum ka hukum ba la pynmih da ka Joint Secretary ka tnat ka Koit ka Khiah ka Sorkar Jylla ka Dr. Rezina Ch. Marak ha ka sngi Baar, ïa ka thup kyrteng la pynmih da kaba bud ïa ka jingïakren pynbeit ha ka jingïalang kaba la long ha ka 6 tarik mynta u bnai.
Kum ban shu kdew, kawei na ki samla pule, ka Tanuska Chakravorty, ha kaba nyngkong la mang ha ka Seat jong ka Unreserved Category hynrei mynta ka la shah khynñiat shapoh ka Waiting List hadien ka jingpynbeit thymmai.
Ha ka 3 tarik mynta u bnai, ka Sorkar Jylla ka la pynsangeh shwa ban pdiang ïa ka jingpynrung na ka bynta ka MBBS Courses hapoh ka bhah jong ka Central Pool hadien ka jingpyrshah jong ka KSU.
Ka KSU ha ka jingïalang kaba la long bad u Myntri ka tnat ka Koit ka Khiah u Bah Wailadmiki Shylla ha ka Lah Sngi u Blei ka la kdew ba ka jingjied ïa ki samla pule kam dei da ka lynti kaba khuid bad kaba leh hok, ha kaba ki samla pule kiba ïoh kham duna ki mark ki la shah kynthup ha ka Unreserved Category katba ki khynnah Khasi kiba kham heh mark ki shah pynduh hok.
Ka KSU ka la dawa ruh ba dei ban pyndam mardor ïa ka Clause 9.6 na ka Standard Operating Procedure (SOP), ka ki samla pule ki hap ban jied hapdeng ka Open Category bad Schedule Tribe Category. Ka seng ka la kynthoh ba kane ka kyndon ka long kaba arsap bad kaba pynduh ïa ki samla pule ïa ka bynta kaba ki dei hok ban ïoh ha ka Open Category.
Ha kajuh ka por, ïa ki samla kiba la shah jied na ka bynta ka Course pule la bthah ba kin ai jingtip sha ka tnad ka Koit ka Khiah, Room No 502, Additional Building jong ka Meghalaya Secretariat, ha ka 7, 8 bad 9 tarik Risaw, shwa ka por 5:00 baje janmiet na ka bynta ban pdiang ïa ka Course bad ban pyntreikam ïa ka bond-cum-agreement. Ki nongalai ki dei ban wanrah saw tylli ki dur passport size bad ka Aadhaar Card.
Ki samla pule ki bym ai jingtip katkum ka tarik ba la kdew haneng kin duh mardor ïa ka hok ban shah jied bad ïa ka bhah yn ai noh sha kiwei pat.
Ki kyndon kumba la kdew ha ka Advertisement lane ha ka courses bad kiwei kiwei kin dang ïai neh kumjuh, la ong ka hukum.
