Nongpoh, Nailur 14: Kum ka jingai burom ne ka jinglehburom ba khatduh na ka bynta u Dr. D.D Lapang uba la khlad noh ha ka 12 tarik u Nailur 2025 na sla jong kane ka pyrthei, u Deputy Commissioner ka Ri Bhoi u Abhilash Baranwal, u la ai da ka jingpynbna paidbah ba kan dei ka sngi shuti ha ka 15 tarik u Nailur 2025 kaba dei ka sngi leh burom khatduh ïa ka met ba dang sah jong u D. D.D Lapang.
Katkum ka kyrwoh ne ka hukum ba la pynmih da u deputy commissioner ka Ri Bhoi, la ong ba ha katei ka sngi leh burom khaduh ïa u Dr. D.D Lapang ha Nongbah Shillong, baroh ki ophis sorkar, ki Magisterial Court, ki Bank bad ki skul kan long ka sngi shuti bad yn nym long trei, kab dei ka jingleh burom ba khatduh ïa une u nongïalam uba la dei ruh u Myntri rangbah ka jylla.
Kane ka hukum ka la bthah ruh ïa baroh ki heh jong ki bor pynïaid ïa ki ophis, ki skul, ki bank bad kiwei kiwei de ki ophis treikam ba ki hap ban bud ryntih ïa kane ka hukum ba la pynbna shuti ha RI Bhoi.
Shuh shuh, kane ka jingpynbna shuti ha Ri Bhoi District, ha ka sngi leit ontep ïa u Dr. D.D Lapang ka la don ruh ka jingkyrpad na ka Ri Bhoi Dorbar bad ka Ri Bhoi District Sport Association ban pynbna shuti ha katei ka sngi leit ontep ba khatduh ïa u Dr. D.D Lapang bad kane ka long ruh shi bynta kum ka jingburom ïa utei u nongïalam ba ka sorkar bad ka bor synshar District ki la pynbna shuti kaba long kum ka jingburom ba khatduh ïa une u nongïalam khamtam ba la tip ïa u kum u Kpa ka Ri Bhoi.
