Pynbna shuti ha Ri Bhoi District ha ka sngi ontep ïa u Dr. DD Lapang, kyrpad ka Ri Bhoi Dorbar ia ka sorkar
Nongpoh, Nailur 13: Ka Ri Bhoi Dorbar mynta ka sngi ka la pynpaw ïa ka jingsngewsih ban duh noh ïa uwei u riewkhraw bad u nongïalam ba radbah ka Ri Bhoi, kata ka dei hadien ka jingkhlad noh u Dr. D.D Lapang kum u MLA barim ka Nongpoh bad uba la ioh ban bat ruh haduh 4 sien kynthih kum u myntri rangbah ka jylla Meghalaya.
Haba ïa kren sha ki lad pathai khubor, u General Secretary ka Ri Bhoi Dorbar, u Bah Sunlight Shadap u la ong ba ka jingkhlad noh u Dr. D.D Lapang ka la long shisha ka jingduhnong kaba khraw khamtam ïa ka Ri Bhoi District ba la tip paidbah ruh ïa u kum u Kpa ka them Ri Bhoi, kiba dei halor ka nongrim kum u nongïalam uba la don shisha ïa kata ka kyrdan nongïalam.
U la pynpaw ruh ba kane ka jingkhlad noh u Dr. D.D Lapang ka long ruh ka jingduhnong kaba khraw ym tang ïa ka Ri Bhoi District bad ka jylla, hynrei ka dei ruh ka jingduhnong kaba khraw ïa ka Ri Bhoi Dorbar, ha kaba kum u nongïalam u la don bynta ban seng ïa ka Ri Bhoi Dorbar da ka jingthmu ban shakri kyrpang ïa ki paidbah ka Ri Bhoi District.
U la ong ruh ym lah ban niew ne khein ïa ki matti u Dr. D.D Lapang uba la shakri ïa ka jylla haduh ka kyrdan Myntri rangbah bad khamtam ïa ka Ri Bhoi District kaba u la ong shisha uta u nongïalam ba radbah ban wan rah shibun ki jingkylla hapoh ka dong ka thaiñ Ri Bhoi kaba ngim lah ban niew tang hangne.
Shuh shuh, u la ong ruh na ka liang ka Ri Bhoi Dorbar ka phah ïa ka khubor sngewlem sha ka ing ka sem, ki khun ki kti bad ka lok ba u Blei un ai ïa ki ïa kata ka jingtngen ha kum kane ka por ba u lyoh badum u wan kah ïa ka ing ka sem jong ki bad ki buh ruh ïa ka jingduwai ba kyrpang ba U Blei un ai ïa kata ka jingpynjahthaid ïa ka mynsiem jong u Dr. D.D Lapang ha kata ka khet bneng Jong U Blei.
Ha kawei ka liang, na ka liang ka Ri Bhoi Dorbar ka buh ïa ka jingkyrpd ïa kiba haïing ha sem ba lada long kaba lah kin ailad ban wan rah ïa ka met ba dangsah jong u Dr. D.D Lapang sha Ri Bhoi, khnang ba kiba ieit ba thoiñ kin ioh ban wan peit khatduh ïa u Dr. D.D Lapang ha kaba bun na Ri Bhoi ki angnud ban iohi khatduh ïa u Dr. DD Lapang. Ka Ri Bhoi Dorbar ka buh ruh ïa ka jingkypad na ka sorkar bad ka bor synshar District ba kin pynbna noh kum ka sngi shuti ha Ri Bhoi District kum ka jingleh burom khatduh ïa ka met ba dang sah jong u Dr. D.D Lapang.