Pynbna shah thngan khlem buh por, lada ym pyllait ïa ka Lumpongdeng na ka Taj Umiam Resort

Shillong, Ïaiong 9: Ka Green Tech Foundation Meghalaya ha ka sngi Palei kynsan kynsan ka la wan ban pynlong ïa ka jingïakhih hakhmat ka secretariat bad pynbna ïa ka jingshah thngan khlem buh por, kaba sdang treikam mardor, kum ka jingpyrshah ïa ka jingbym lah jong ka sorkar jylla ban pynsangeh ne pyllait ïa ka jingpyntreikam ïa ki projek jngohkai pyrthei ha ka dewlynnong Lumpongdeng ha ha pung Umiam.
“Ngim thaw kano kano ka ishu ka ban ktah ïa ka shongsuk shongsain.Ngi pyrshah tyngeh ban pynjot ïa ka mariang ha Lumpongdeng”, la ong u Chairman ka foundation u bah H Bansiewdor Nonglang da kaba ban jur ba ka kynhun ka la dep thoh sha ka sorkar jylla bad ïakynduh ruh ïa ki bor ba dei peit.
U bah Nonglang u la buh jingkylli ïa ka jingkam jong ki bor pyniaid ba ki nongiakhih ki khanglad ïa ka leit kawan, da kaba ong, “Kumno ki kynnoh ïa ngi ba ngi khanglad ïa ka leit ka wan?Katba ki bos ki ieng hangne, bad pynban ki kynnoh ïa ngi.”
Ka Green Tech Foundation ka pyrshah ïa ka jingpynheh ïa ka Taj Umiam Resort & Spa ha Dewlynnong Lumpongdeng, da kaba kdew ba ka don ka jingsngewkhia halor ka jingktah ïa ka mariang.
“Ngim pyrshah ïa ka projek, hynrei ngi ong pyllait ïa ka Dewlynnong Lumpongdeng na kane ka projek namar ba ka don hapdeng ka pung Umiam bad kumno phin wanrah ïa ki mashin heh bad pynjot ia ka Dewlynnong?” la kylli u Nonglang.
U Secretary General ka Green Tech Foundation u bah Ritre Lyngdoh u la ong, “Ngi la phah ïa ka dorkhas sha ka sorkar ban dawa ba kin weng noh ïa katei ka projek, ngim dawa ban pynsangeh noh ïa ka 66 akar baroh kawei hynrei tang 36 akar kaba ki la ai ha Dewlynnong Lumpongdeng.”
U bah Nonglang u la maham ba ka jingshah thngan kan ïai bteng wat lada shah kem bad shah srt sha phatok ruh.
“Ngi la ong ïa ki pulit ba wat lada phi kem ïa nga bad phah sha phatok ruh ka jingshah thngan khlem pud por kan ïai bteng, lada ki kem ïa ngi mynta ka sngi ka jingshah thngan khlem pud kan sdang ha patok ruh”, u la ong.
Kine kiba ïakhih ki dawa da ka jingthoh jingpynthikna na ka sorkar ba ïa katei ka projek bad ïa ka contract yn weng noh na ka dewlynnong Lumpongdeng.
“Haduh bad lymda ka sorkar kam ai ha ngi da ka jingthoh ba ki la weng noh ïa ka projek bad ka contract na Lumpongdeng, ngin nym kynriah nangne”, la ong u bah Nonglang.