Pynbna paidbah u DC ka EJHD ïa ka project LUF ban wad ïa kiba pang HIV ban pynwan sha ki jaka ai jingsumar

Khliehriat, Naitung 20 : U Deputy Commissioner ka East Jaiñtia Hills District, u Abhilash Banarwal, IAS mynta ka sngi u la pynbna paidbah ïa kawei ka project kaba la tip kum ka Lost to Follow Up (LFU), kaba halor ka jingthmu ban wad bniah ïa ki 241 ngut kiba dei ki nongshong shnong jong ka East Jaiñtia Hills District, kiba don ïa u khñiang jingpang HIV khnang ban dup lah ban pynwan ïa ki sha ki jaka ai jingsumar, ka Antiretroviral Theraphy Treatmeny, khnang ban dup lah ban tehlakam ïa ka jingsaphriang u khñiang HIV, ïa kane ka project yn pyntrei da ka Meghalaya State Network of Positive People (MSNPP).
Katkum ka jinglum jingtip ka Meghalaya Aids Control Society (MACS), la ong ba ki don haduh kumba 1500 ngut ki briew ha East Jaiñtia Hills District kiba don ïa u khñiang jingpang HIV, kiba wan ban shah sumar ki don tang 1000 ngut, katba 500 ngut pat, don nadeng jong ki kiba la khlad noh bad don ruh kiba khlem wan shah sumar shuh, nalor kitei ki 1500 ngut la ong ba la lap ba ki dang don shuh shuh sa 241 ngut kiba don ïa ka jingpang HIV kiba yn dang wad bniah ïa ki lyngba katei ka project ban pynwan ïa ki sha ki jaka ai jingsumar.
Ha ka jingïalang ba la pynlong ha conference hall ha ophis u Deputy Commissioner ha Khliehriat, u Abhilash Banarwal, IAS u la ïathuh ba ki don haduh 241 ngut ki briew kynthup ruh ki khynnah bad ki khyllung kiba don ïa u khñiang jingpang HIV ki ba khlem wan mih sha ki jaka ai jingsumar, kumta lyngba katei ka project yn pynlong da ka jingwad bniah kaba da ki Tracking/Tracing Drive ka ban neh haduh lai bnai bad ha kane ka jingwad bniah yn test HIV ruh ïa ki ba haiïng ha sem bad ïa kito kiba don ka jingïadei kaba jan bad kito kiba don ïa u khñiang HIV.
“Kane ka drive ne ka jingwad bniah kan long ruh ha kajuh ka por kum ka lad ban ai jingpynshai ne awareness ïa ki paidbah bad kumjuh ruh ïa kito kiba don ïaka jingpang HIV ba kin wanphai biang pat sha ka longbriew man briew kaba kumba long lang kiwei pat ha ka imlang ka sahlang, ban weng noh ïa ka jingshah peit ibeiñ ha ka imlang ka sahlang” ong u Deputy Commissioner.
Ha kajuh ka por, u Abhilash Banarwal, IAS u ai ka jingkhublei kyrpang ïa ka Project Assistant, AHANA, ka Assistant Director, Meghalaya Aids Control Society (MACS) bad ïa ka tnat Meghalaya State Network of Positive People (MSNP+) kaba ka wanrah ïa kane ka project kaba donkam kaba yn pynlut haduh T 4 lak tyngka hapoh ka lai bnai, kaba yn pynbit pynbiang lyngba ka Corporate Social Responsibility (CSR) bad ha kajuh ka por u pynbna ruh ba ka jing sumar ka ART ruh mynta ka la don ha Khliehriat CHC.
U Project Assistant, AHANA, u bah Barry.L.Kharmalki u la batai shai halor ka project ban wad ïa kiba pang HIV, ka Lost to Follow Up (LFU), kaba la tip kum ka Tracking/ Tracing Drive (Finding the Missing Links Project) ba kane kan ïarap shibun ban tehlakam ïa ka jingsaphriang u khñiang HIV, la ong ba yn don ruh 3 ngut kiba yn ai jinghikai ïa ki da ka MSNP+ bad la pyntikna ba kane ka long jar jar bad kin nym pynbna ïa ki kyrteng jong kito kiba pang HIV.
La ong ruh ba lada don kino kino kiba khlem wan sumar shuh bad kiba dang kwah ban wan bteng ïa ka jingshah sumar ïa ka jingpag HIV ki lah ban phone ïa Project Coordinator, u bah Barry.L.Kharmalki ha u number 8732015954 bad kane kan long jar jar yn nym don ba tip.
Kiba la ïa don ryngkat ha ka jingïalang ha conference hall ki kynthup ruh, ka Assistant Director jong ka Care Support & Treatment jong ka MACS, ka kong Iada Wriah, ka Co-Founder jong ka MSNP+ ka Agui Daimai, ka kong F.Wann, MCS, kaba dei ka EAC ha East Jaiñtia Hills District.