Shillong, Naitung, 15: U Myntri Rangbah ka Jylla u Conrad Sangma ha ka sngi Baar u la pynbna paidbah ïa ka Mahatma Gandhi Rural Employment Guarantee Scheme ban pyntrei noh ha ki Census Town kiba don hapoh ka jylla baroh kawei.
Kane ka Flagship Programme ba la bei pisa da ka Sorkar Pdeng ka la wanrah bun ki kam pynroi ha ki shnong nongkyndong. Sa mynta ka kynti kane ka prokram sa pynmyntoi ïa ki Census Town.
U Myntri Rangbah ka Jylla u Conrad Sangma haba kren kum u Kongsan u la pynpaw ïa ka jingsngewkmen bad ai khublei ïa ka Sorkar India kaba la pdiang ïa ka jingtyrwa jong ka Sorkar Jylla ban pynrung ïa ka MGNREGS sha ki Census Town.
“Kane ka sienjam kan pynmyntoi ïa ki shi lak ngut ki nongshong shnong kiba shong basah ha ki Census Town jong ka Jylla,” ong u Conrad.
U la ïaroh ïa ka jingtrei shitom jong ki Village Employment Council (VEC) bad ïa ki shnong ki thaw ha ki saw snem ba la leit noh, ka jingpynlut pisa haba pyntreikam ïa kane ka prokram ka la kiew kumba T. 600 klur sha ka T. 1600 klur manla u snem.
“Nalor ka MGNREGA, ka Sorkar Jylla ka la seng nongrim ban pynkha ïa ki Self Help Group na ka bynta ki kynthei kaba la kiew na ka 4000 tylli ha u snem 2017-18 sha ka 41,000 hajar tang hapoh une u snem,” la ong u Conrad bad bynrap, “palat T. 380 kluar ka pisa la aiti sha ki SHG bad kane ka la kyntiew ïa ka ïoh ka kot jong ki kynthei ha ki shnong nongkyndong.”
U Myntri Rangbah u la ai khublei ïa ki shnong ki thaw kiba la kyrshan borbah bad kiba la ïatreilang ha kiba bun ki kam ba la wanrah da ka Sorkar Jylla khamtam ha ka por ba la wan lynshop ka jingpang khlam COVID-19 bad kiwei kiwei de ki jingkyrshan ha kaba pynbhabriew ïa ki shnong ki thaw, ka jingpynkhuid ïa ki wah bad ki wahduid bad kiwei kiwei.
Haba pynpaw halor ka jingbym pat pyntreikam ïa ka skhim Jal Jeevan Mission ha ki Census Towns, u la ong, ba ka jing Sorkar ka la phah ïa ka jingtyrwa sha ka Sorkar Pdeng na ka bynta ka jingmynjur.
U Myntri ka tnat C&RD Block u Bah Hamletson Dohling uba la long kum u Kongsan ha kane ka sngi u la kren shaphang ka jingtrei shitom jong ka State Rural Employment Society (SRES), ka tnat C&RD kaba la pynpoi haduh u pud ban pynrung ïa ki Census Town hapoh ka MGNREGA.
U la ïaroh ïa ka jingshimkhia jong u Myntri Rangbah bad kyntu ruh ïa ki 29 tylli ki shnong kiba hap hapoh ka shnong Mawlai, Sohra, Nongmensong bad Madanrting Census Towns ba kin pyntreikam hok ïa kane ka skhim tang shu sdang pyntreikam.
Ha kane ka jingïalang ba la pynlong da ka State Rural Employment Society (SRES) ryngkat ka jingïatreilang bad ka ophis jong ka Deputy Commissioner, East Khasi Hills, la ïashim bynta lang da u MLA ka Mawryngkneng u Bah Pynïaid Sing Syiem, u MLA ka Sohra u Gavin M. Mylliem, u MLA ka Shella u Bah Balajied Kupar Synrem, u MLA ka Mawlai u Bah P.T. Sawkmie, u CEM ka KHADC u Bah Titostarwel Chyne, u MDC ka Mawlai u Bah Teiborlang Pathaw, u Principal Secretary ka tnat C&RD, u Mission Director ka SRES, ka Deputy Commisisoner ka East Khasi Hills lem bad ki Rangbah Shnong na ki shnong bapher ka Mylliem, Shella bad Mawlai.
