Shillong, Naitung 16 : U MLA ka Mawlai, Bah Process T Sawkmie u la kyntu ïa ka sorkar Jylla ba kan pyntip paidbah noh ïa ka kaiphod halor ka jingshah siat ïap jong u nongïalam barim ka HNLC, Bah Cheristerfield Thangkhiew ha u snem ba la dep.
“Nga kyrpad ïa ka sorkar jylla ba kan pynmih noh ïa kane ka kaiphod khnang ba ki paidbah jong ka Mawlai baroh kawei kin shai namar kumba long mynta ki sah ha ka umdum namar kim tip la thoh kumno ha katei ka kaiphod,” ong u MLA haba kren bad ki lad pathai khubor.
Utei u MLA, u ong ruh ba ki sngewthuh ba katei ka kam kadei hapoh ka jingpeit jong u Myntri Rangbah bad kane ka kam mynta u hap ban rah ha ka kynhun Myntri bad nangtei pat kin sa bishar bniah nadong shadong ha shwa ba kna pynbna paidbah.
“Na ka liang jong ki paidbah hi ki kwah ba kane ka kaiphod kan long beit kumba la phah kumta hi. Ngi ngeit skhem ruh ba na ka liang ka iing ka sem ruh ki kwah kumta hi kumjuh ruh ka Sur u paid nong Mawlai ru ki kwah ïa kata hi,” la bynrap shuh shuh u Bah Process.
Kumta, u ong ba kum u nongmihkhmat ka thaiñ u kwah ba kin ïohi noh kham kloi ïa katei ka kaiphod khnang ban lah ban weng noh ïa ka umdum kaba don baroh shi katta ha ki paidbah ka Mawlai bad ki paidbah ka jylla hi baroh kawei.
Dang hynin ka sngi, na ka liang u Myntri Rangbah u l adep pynpaw ba ka Sorkar Jylla ka dang pule bniah ïa ka kaiphod tohkit jong u nongbishar ba la shongthait u Justice T. Vaiphei halor ka jingshah siat ïap jong u nongïalam barim ka Hynñiewtrep National Liber-ation Council (HNLC) u Bah Cherishterfield Thangkhiew ha ka 13 tarik, Nailar, u snem baladep.
“Ngi la ïohpdiang ïa ka kaiphod bad ngi dang bishar bniah ïa ka. Namarba ka dei ka kaiphod tohkit kaba jrong, ngi donkam ban ïoh kham bun ka por bad ngin sa pyntip sha phi kaei kaba mih na kane ka kaiphod,” u la ong.
