Nongpoh, Risaw 29: Da ka jingangnud ban wanrah ïaka thungkam thungjam kaba khuid ba suba hapoh ka District lyngba ka District Selection Committee, ka Federation of Khasi Jaintia and Garo People (FKJGP) North Khasi Hills District mynta ka sngi kila leit ban ïakynduh syndon ïa u Secretary ka District Selection Committee, Ri-Bhoi District u Raja Brahma bad aiti syndon da ka dorkhas naka bynta ban dawa pyntreikam ïaki mat ba kongsan ba kum ka seng ka kwah ban ai jingmut bad pyntreikam khnang ba ka jingthung kam kan long kaba khuid ba suba khlem kano kano ka jingleh shilliang.
Kitei ki mat dawa ba ka seng ka buh ki kynthup ban pynmih ïaki answer key lem bad ki marks jong kito ki samla kiba la ïakhun ïaka eksam haka official website jong ka district, ban pynpaw paidbah ïaki kyrteng jong ki kyrtong kiba rung sha ka Personal Interview bad ban pynbna kham kloi ïa ki post ba lait haka district haki tnad sorkar bapber bapher kiba dei ban ïaid lyngba ka DSC.
Haba kren sha ki lad pathai khubor hadien ka jingleit kynduh, naka liang u Bah Luistar Lyngdoh President bad u Bah Ricky Majaw General Secretary ka FKJGP, North Khasi Hills District kila pynpaw ba kum ka seng kala leit ban buh da ka dorkhas sha ki bor district ka dei namar ba ki kwah ba ka thungkam thungjam haka District Selection Committee ka dei ban long kaba khuid ba suba katkum ka jinglah jong ki kyrtong ym ban shna ne leh shilliang.
Ki la ong ruh ba kum ka seng ka kwah ba ki bor ba dei peit ki dei ban pynlait paidbah ïaki answer key khnang ba ki samla wadkam kin lah ban bishar bñiah ïalade ïaka jinglah jong ki haba ki thoh ïaki eksam bad khamtam ban pynmih ruh ïaki kyrteng jong ki samla kiba rung sha ka personal interview khnang ba kan nym don kano ka jingleh shilliang lem bad ki marks jong ki ba ki ioh.
Kila ong ruh ba ki samla wadkam ki durut ban ïakhun ïaka eksam hynrei bunsien ka pynduh mynsiem noh ïaki namar ka don ka jingleh shilliang haka thungkam kumta kum ka seng kam kwah ban pynduh mynsiem ïaki samla hynrei ban ailad ïaki ban ïakhun haka rukom kaba khuid bad kaba hun mynsiem.
