Jowai, Naiwieng 12: Ka seng ki samla pule jong ka Warjaintia Students’ Union (WjSU) lyngba ka Education Sub Committee kaba peit bad khmih ïa ka Second Warjaintia Scholarship Examination 2025, kala pynbna pynbna ba ïa kane ka Exam yn pynïaleh ha ka sngi saitjaiñ jong ka 13 tarik u Nohprah, 2025 haki 15 tylli ki Examination Centres hapoh ka dong ka thaiñ Warjaiñtia baroh kawei.
Ka por jong ka examination na ka bynta ka Section-I kan long 2 kynta thik 10 baje mynstep haduh 12 baje mynsngi, na ka bynta ki Section-II bad III kan long 3 kynta thik 10 baje mynstep haduh 1 baje nohphai sngi.
Ka seng kala pynbna ruh ïa ka Syllabus na ka bynta kane ka Competitive Examination bad yn pynpoi ha ka por kaba biang ïa ka Syllabus sha baroh ki Upper Primary bad Secondary School hapoh ka thaiñ.
La kyntu ïa baroh ki Headmasters, Principals ban shim khia khnang ba kane ka Second Warjaiñtia Scholarship Examination 2025 kan ïaid beit ïaid ryntih ban myntoi ki khun samla ka thaiñ Warjaiñtia hi baroh kawei.
Khadduh ïa wai ka seng hi baroh kawei ka pan ka jingkyrshan ka kti ka diang ka kti ka mon u paid ka Warjaiñtia bad kumjuh na kiwei de, la pynkut ka kyrwoh na u Publicity Secretary bah Gabriel Shylla.
