Shillong, Naitung 11 : U Myntri Khynnah ka tnad Petroleum and Natural Gas jong ka sorkar pdeng, u Rameswar Teli u la ong ba lyngba ka Indradhanush Gas Grid Ltd (IGGL), kaba dei ka kynhun synrop jong ka Indian Oil, ONGC, GAIL, Oil India, bad ka Numaligarh Refinery, yn sa pynpoi poi da ki pipe gas ha baroh ki jylla jong ka thaiñ shatei lam – mihngi jong ka Ri kynthup ha Meghalaya.
“Kane kan kynthup wat ha Meghalaya ruh ha kaba ïa ki pipe yn pynpoi haduh Shillong kaba shen ngin sdang noh wat ïa ka kam ruh,” ong u Teli haba kren bad ki lad pathai khubor ha kane ka sngi Nyngkong ha Shillong.
U Myntri u la ong ruh ba dang shen ki la khot ïa ka tender na ka bynta ki san tylli ki block hynrei wat la ka Meghalaya kam pat paw kyrteng pynban shen yn sa khot tender na ka bynta kane ka jylla ruh.
Haba kren pat halor ka jingbteng ka jingkiew ka umphniang ha ka ri, u Teli u la kynnoh ba ka daw tynrai hi kadei namar ka jingkiew dor ha ki iew ka pyrthei.
“Ngi hap ban wanrah na shabar haduh 83 persen ka umphniang bad ka gas na shabar ri kumta lada ka don ka jingkiew dor ha ki iew barri, kumta ruh khlem pep kan don beit ka jingkiew ha ka dor umphniang lane ha ka gas,” bynrap biang u Myntri. Nalorkata, u ong ruh ba ka sorkar ka pyrshang ban wad ïa ka jingdon ki par umphniang ha kylleng ki bynta jong ka Ri.
“Ngi ïoh jingtip ba ha ka thaiñ shatei lam mihngi jong ka Ri ba don ki par umphniang. Ha Nagaland lyngba ka jingwad bniah ngi lap ba ka don ka umphniang bad ka petrol, ngi la ïoh jingtip ruh ba kine ki don wat ha Meghalaya ruh,” u la ong.
Katkum ka jingong jong u, shen hi ka sorkar kan sa wad bniah shuh shuh la ka long ha Meghalaya, Nagaland lane ha Mizoram haba ïadei bad ka jingdon ka umphniang bad ka petrol.
“Lada ka umphniang bad ka gas ka la don lypa ha ka ri ngi lah ban tehlakam ïa ka dor,” bynrap biang u Myntri. Shuh shuh u la ïathuh ruh ba tad haduh mynta hi, ka India ka la hap ban shu shaniah beit na shabar ri ïa ka gas bad kumta lada ka dor ha ki iew barri ka kiew, kane kan ktah lang ruh wat ïa ka dor ha ka Ri ruh kumjuh.
