Pynbna ka Sorkar Jylla ïa ki jingthmu ban kyntiew ïa ka phutbol, T 3 klur yn bei tyngka ïa ki klob ba ïakhun I-League

Shillong, Nailar 02: Ka Jawaharlal Nehru (J.N.) Stadium ha Shillong ka la ïoh ban pynlong ïa ka jingïalehkai ba nyngkong na ka Group F jong ka lympung 133rd Indian Oil Durand Cup ïa kaba la plie pyrda da u Myntri Rangbah ka jylla – u Conrad K. Sangma, ha ryngkat u Symbud Myntri Rangbah- Bah Prestone Tynsong bad u Sniawbhalang Dhar, nangta u Myntri ka tnat ïalehkai- u Bah Shakliar Warjri, u Chief Secretary – Bah D P Wahlang, IAS.
Ha kane ka sngi la ïadon ryngkatlang u Air Marshal SP Dharkar, Air Officer Commanding in Chief Eastern Air Command, Lieutenant General Sanjay Malik, General Officer Commanding 101Area, Maj Gen Rajesh A Moghe, VSM Vice Chairman Durand Cup Organising Committee lem bad kiwei de ki heh shipai bad ki heh sorkar.
La sdang ïa ka jingïalehkai kaba nyngkong hapdeng ka Shillong Lajong FC pyrshah ïa ka Tribhuvan Army Football Club (TAFC) kum shi bynta ki prokram ïalehkai ha Jawaharlal Nehru Stadium ka ban pynlong ïa ki jingïakhun na ka Group F, ha kaba ka Shillong Lajong FC ka la khur ïa ka jingjop da tang shi kol.
Lah ban kdew ba Sorkar ka la ïaleh katba lah ban pynkloi ban maramot pynbha ïa kane ka madan shuwa ban sdang ka lympung ban pynthikna ba kane ka Stadium ka long kaba bit ban pdiang ïa ka Durand Cup. Kane ka kynthup ïa ka jingshna pynbha ïa ki jaka shong ban bud ryntih katkum ki kyndon ka International Event hapoh ka AFC. La ïoh ruh ban siang da u phlang tynrai baroh u ba ïahap bad ka jinglong jingman ka suiñbneng ha Shillong.
Naduh ba ka sorkar ka la pyntreikam ïa ka Sports Policy ha u snem 2018, ka tnad Sports ka la nang ïaid shaphrang ha ki kam. Kane ka kynthup ïa ka jingtei ïa ki jaka ïalehkai ha kylleng ka jylla, ka jingwanrah ïa ka ‘Talent identification’ bad ki skhim kum ka STAR Program, bad ruh ka jingpynlong ïa ki lympung ïalehkai ka Jylla, ka ri, bad ki rynsan ïalehkai International.
Ha kaba ïadei bad ka phutbol, ka sorkar ka la wanrah da ka Mission Football, ka jingthmu jong ka Sorkar ban kyntiew ïa ka phutbol, kaba la pynthikna ban tei haduh 111 tylli ki Grassroots Centre ha kylleng ka jylla, ha kaba haduh 8000 ngut ki khynnah kin ïoh jinghikai man u snem.
Nalor kane, palat 25,000 ngut ki khynnah ki ju ïashimbynta ha ki kyrdan U-12 Football Tournament bad ruh ka State Level Subroto Cup. Ka jingïatreilang jong ki synjuk ryngkat bad ka Meghalaya Football Association ka la lah ban pynurlong ïa ka Meghalaya State League bad ruh ïa ka Meghalaya Youth League kaba seisoh.
Shuh shuh, lyngba ka Meghalaya Tourism, kaba bei tyngka ïa ka North-East United FC bad ka Shillong Lajong FC ka la jam mynta la ar snem, ha kaba ka jingkyrshan pisa ka la kot sha ka 10 klur. Kane ka jingbei tyngka khamtam ha ka phutbol, ka la long ka jingmyntoi ïa ka jylla. ïa kane lah ban sakhi hadien ba ka kynhun Meghalaya ka la wan ba ar ha ka Santosh Trophy, 2023. Nangta ka kynhun U-17 ka la ïoh ban khur takma ha ka Khelo India Games, da kaba jop takma ksiar ha u snem 2024 ha Tamil Nadu.
Ha kane ka sngi u Myntri Rangbah u la pynbna ruh ba ka sorkar kan ai jingïarap da ka song pisa kaba 3 Klur tyngka sha ki klob ïalehkai phutbol ka jylla kiba ïakhun ha ki kyrdan kiba kham shajrong kum ha ka I-league nalor kiwei kiwei.
U la ïathuh ba na ka liang ka sorkar kan ai 2 klur tyngka katba ka 1 klur kan dei lyngba ki nongbei tyngka bad baroh kan long 3 Klur tyngka. U la ong ba kane ka sienjam ba ka sorkar ka la shim ka long ban pynshlur ïa kiwei pat ki klob ba kin nang kiew ha ka phutbol.
Ha kane ka sngi, u Myntri Rangbah u shim ruh ïa ka kabu ban ai khublei ïa ka tnat shipai Indian Army kaba la jied ïa ka Nongbah Shillong ban pynlong ïa ki jingïalehkai jong ka Durand Cup ba la plie pyrdan ha kane ka nongbah ha ka sngi Thohdieng.
Shuh shuh, u la pynpaw ba kane ka jingbei tyngka kan nym long kaba sepei, hynrei kan long ka jingmyntoi ban kyntiew ïa ki khynnah samla ka Jylla ha ki kam ïalehkai. Da ka Mission Football 2, ka Sorkar ka thmu ban nang pynroi shuh shuh ïa ka phutbol. Kane lah ban sakhi hadien ba ka Sorkar ka la soi jingïateh bad ka North East United Footbal Club (NEUFC) ban tei ïa ka shlem ai jinghikai phutbol ha Mawkhanu, New Shillong.