Pynbna ka SIDBI bad ka RMA ban tei ïa ka jaka ai jinghikai

0

Shillong, Lber: Ka Small Industries Development Bank of India (SIDBI), ka ba dei ka tnat aijingïarap pisa jong ka ri na ka bynta ban seng ïa ki kam karkhana rit, ki ba pdeng kumjuh ki ba kham heh ka la mynjur ban aijing kyrshan ïa ka Ramakrishna Mission Ashrama, Sohra, na ka bynta ban tei ïa ka jaka aijinghikai (Alternate Livelihood Centre) ïa ka ba yn ai kyrteng “Swava lamban Alternate Liveli hood Unit for The EAST” (SALUTE) hapoh Rama krishna Mission Ashram [RKMS], Sohra, kata ban pynlong ïa ki jingai jinghikai ha ki kam thaiñ jingthaiñ, suhjaiñ, jingpynmih ïa ki mar ki mata bad kiwei kiwei.
Ka jingthmu jong kane ka long ruh na ka bynta ban plie ïa ki lad ki lynti na ka bynta ki khynnah ki ba sangeh noh ïa ki jingpule ki jong ki, kumjuh na ka bynta ki longkmie bad ki trai shnong na ki jylla ka thaiñ shatei lammihngi (North East).
Ka thong ka ba kongsan eh ka thmu na ka bynta ki khynnah ki ba la sangeh noh ïa ki jingpulit ki jong ki, ki samla ki ba la tbit hynrei ki bym donkam don jam, ki samla don sap ki ba khlem kam khlem jam nalor kwiei pat.
U V. Satya Venkata Rao, DMD, SIDBI bad u Maharaj ka RKMA ryngkat lang ki la pynbna halor ka jingpyntreikam ïa katei ka projek SALUTE.Na ka liang u Maharaj u la kdew ruh ba ka jingkyrshan halor katei ka sienjam lyngba ka RKM kan kyntiew ha ka ba ïadei bad ki prokram aijinghikai bapher bapher ha ka jylla bad ka thaiñ North East hi baroh kawei.U la kdew ruh ba ka RKM ka pyniaid haduh 77 tylli ki skul bad kumjuh ïa ki jaka aijinghikai ka ba thmu kyrpang khamtam na ka bynta ki samla ki ba la sangeh noh ïa ki jingpule ki jong ki.
Shi bynta jong kane ka jingkynduh, na ka liang u Rao u la ong ba ki sienjam ba kongsan jong ka SIDBI lyngba ka Corporate Social Responsibility [CSR] jong ka, ka thmu na ka bynta ban kyntiew ha ki nong seng kam lajong bad ruh ban aijingkyrshan na ka bynta ki samla na ka thaiñ north east ba kin shim ïa ki lad ki lynti ki ban lah ban kyntiew ha ki kam lajong.
Na ka liang u Maharaj u la batai bniah ruh halor ki jingtreikam ba la shim da ka Ashrama bad halor ki jingjop ki ba ka Swavalamban Centre ka ba la dep ïaid lypa lyngba ka jingïarap jong ka SIDBI ban kyntiew ïa ki longkmie ha ki kam hikai suhjaiñ bad thaiñ jaiñ.
Ha kajuh ka por u ai ruh ka jingkhublei ïa ka SIDBI halor ka jingpynïoh ïa ka Ambulance ba la pyndait ryngkat ki tiar jingsumar ki ba biang ha ka por ba ka jingpang covid ka dang saphriang bha, ha ka ba lyngba kane ka Ashrama ka la lah ban ai ïa ki jingïarap ha ka por ka ba biang na ka bynta ki spah ngut ki longïing ki ba duk ba kyrduh.

Leave A Reply

Your email address will not be published.