Pynbna ka NESO ïa ka 11 tarik Nohprah kum ka sngi ba dum tam

Shillong, Nohprah 11: Ka kynhun ba kdup ïa ki seng samla pule na ki jylla bapher bapher kane ka thaiñ shatei lam mihngi jong ka Ri India ka North East Student Organisation (NESO) ka la pynbna ba ka 11 tarik u Nohprah kan long kum ka sngi ba dum tam ïa kane ka thaiñ namar dei ha kane ka sngi ka ïing dorbar ka Ri India ka Parliament ka la pdiang bad mynjur ïa ka Citizen (Amendment) Bill ha u snem 2019 kaba la long aiñ (Act) mynta.
Shuwa ba ka ïing dorbar bah ka Ri India kan pdiang ïa kane ka CAB, ki seng bapher bapher ha kane ka thaiñ shatei lam mih ngi ki la pynlong ïa ki jingïakhih ban pyrshah ïa kane ka CAB, wat ha pdeng ka jingpyrshah ka sorkar pdeng kala pdiang bad mynjur ïa kane ka CAB ha ka 11/12/2019 bad dei halor kane ka nongrim ba ka NESO kala pynbna ïa kane ka sngi ba ka dei ka sngi kaba dum.
Mynta ka sngi ki seng samla pule ha baroh ka ne ka thaiñ ki la pynlong ïa ka jingwah lama ïong ha baroh ki nongbah jong ki jylla kane ka thaiñ shatei lam mih ngi. Ha nongbah Shillong ka seng KSU kaba dei kawei na ki dkhot ka NESO kala wah ïa ki lama ïong ha kylleng kane ka nongbah Shillong ryngkat ki placard ba la thoh lang ruh ïa ki jingthoh bapher bapher.
Katto katne ki jingthoh kiba la wah ha ki placard ki long, ko sorkar India wat pynlong jaka theh niut ïa ka Ri jong ngi, kam dei ban don CAA, kam dei ban don AFSPA, hooid dei ban don ka ILP, sorkar India burom ïa ngi ki trai ri trai muluk da kaba pyntrei kam noh ïa ka Inner Line Permit.