Shillong, Kyllalyngkot 02: Ka Meghalaya Cricket Association ka la pynbna ïa ka kynhun ïalehkai jong ka na ka bynta ka kylla ba-ar jong ka lympung U-23 Men’s Col CK Nayudu Trophy 2025-26, ka ban sdang ha ki sngi ban wan jong une u bnai.
Haba ïanujor bad kiba bun ki kynhun jong kiwei pat ki jylla mynta ka samoi ha ka Col CK Nayudu, ka Meghalaya ka don ha ka Elite Group bad ka la ïakhun pyrshah ïa ki katto katne ki kynhun ba kynsai tam jong ka ri ha ka Elite Group A. Ka la shah rem ar tylli ki jingïalehkai hynrei ka la ïakhun dohïap ban ïakhaid pyrshah ïa ka Goa ha la ïing ha u bnai Naiwieng. Ka Meghalaya ka don ha ka kyrdan kaba hynñiew (7) napdeng 8 tylli ki kynhun ha kane ka group, ha kaba ka Kerala ka don ha ka kyrdan ba sha trai duh.
Ka Col CK Nayudu Troph kaba dei ka lympung ïalehkai kaba bun sngi (multi-day), la phiah ha ki ar kylla mynta ka samoi, ha kaba ka lympung ïalehkai U-23 men’s one day tournament kan long hapdeng jong ka.
Ka kynhun ïalehkai jong ka jylla ka la don katto katne ki jingkylla, ha kaba u Chandra Bahadur Thapa u la shah kynthup ha ka kynhun kaba 15 ngut, ha ryngkat u Pushkar Raj Singh, u Thunun Marak bad u Denikcheng Marak. Baroh saw ngut ki dei ki rangïalehkai kiba la tyngshaiñ bha ha ka State A Trophy.
Ar tylli na ki saw tylli ki jingïakhun ban wan jong ka Meghalaya kin long ha Tura ha madan kriket Alotgre. Kaba nyngkong na kine kan long pyrshah ïa ka Kerala naduh ka 30 tarik Kyllalyngkot katba kaba bud pat kan long pyrshah ïa ka Gujarat naduh ka 13 tarik Rymphang.
Ka prokram kilanmet kaba lyngkot ban pynkhreh kan long naduh ka 17 haduh ka 19 tarik Kyllalyngkot ha Shillong shuwa ba ka kynhun kan mih na ka bynta ka jingïakhun kaba nyngkong pyrshah ïa ka Jharkhand ha Ranchi. Kumta baroh ki nongïalehkai bad ki support staff ki dei ban wan mih ha Shillong ha ka 16 tarik Kyllalyngkot.
Ka thup kyrteng ka kynhun ïalehkai jong ka Meghalaya ki long: Dipankar Baruah (WK), Kevin Christopher (C), Asif Khan, Avinash Rai, Manish Sharma (VC), Shavian Blah, PM Santosh, Sudhir Sahani, Josiah Momin, Gavineal Marpna, Rohit Kumar Yadav, Thunun Marak (WK), Pushkar Raj Singh, Denikcheng Marak, Chandra Bahadur Thapa
Standbys: Sachin Kumar, Purav Agarwal, Dairo A Marak, Gulgul M Sangma, Banialam Mylliemngap
Support staff: Neetesh Sharma (Head Coach), Marty Mustafa (Assistant Coach), Emidao Dhar (Physio), Skhembor Khongbtep (Trainer), Chuba R Marak (Manager)
