Pynbna ka MLA ba la dep mang 230 klur tyngka ban pynbha ia ka surok NH 6

Shillong Jylliew 19: Ka MLA jongka Sutnga Saipung ka Kong Santa Mary Shylla mynta ka sngi Balang, ka la pyntip ba ka sorkar ka la pynïoh ïa ka bhah ba 230 Klur tyngka ban shna ïa ka surok National Highway-06 ha East Jaintia Hills bad ka la kyrpad ïa ki paidbah ba kin long kiba ïai shah katto katne por namar ka jingbym ailad ka mariang.
“Ka jingsniew jong ka surok NH-6 kam dei ba ka sniew tang mynta hynrei la bun bun snem bad ka daw ka long ba la bun palat ki kali bad ka ba-ar ka dei ka jingbym ailad ka mariang ïa kaba ym lah ban leh eiei” ong ka Kong Santa.
Kat kum ka jingong jong ka“Ka sorkar kala khot ïa ka tender bad la ïoh ïa u kontraktor ban pynshna ïa kane ka surok ha ka jingmang pisa ba kot 230 Klur tyngka”.
“Ka jingtrei kala iaid mynta bad ka Sorkar kala peitngor bha ïa ka kam” kala pyntip.Kane ka Nongmihkhmat ka thaiñ ka la kyntu ïa ki kynhun kiba pynlong ïa ka jingïakhih ba kin long kiba ïai shah katto katne por bad ban sngewthuh ba u contractor um pat lah satia ban pyntrei ïa ka surok namar ka jingther u slap.