Pynbna ka MFA ïa ka kynhun na ka bynta ka Santosh Trophy 2025-26

Shillong, Nohprah 17: Ka Meghalaya Football Association ha ka sngi Palei (17 tarik Nohprah, 2025) ka la pynbna ïa ka kynhun ïalehkai ba pura jong ka jylla ka ban ïakhun ïa ki jingïalehkai ba sdang ha ka Senior Men’s National Football Championship na ka bynta ka Santosh Trophy 2025-26 kaban sa long shen.
ïa ka kynhun ïalehkai jong ka jylla yn long kapten da u Hardy Cliff Nongbri bad yn long coach da u Bah Khlain Pyrkhat Syiemlieh.
Ka nongbah Shillong kan sa ïoh ban pynlong ïa lai tylli ki jingïalehkai jong ka wat nyngkong (preliminary round) jong ka Group E, ha kaba ki kynhun ki kynthup ïa ka Meghalaya, Sikkim bad Arunachal Pradesh. Ka Meghalaya kan ïakhun pyrshah ïa ka Sikkim ha ka 19 tarik u Nohprah bad ïa ka Arunachal ha ka 23 tarik u Nohprah. Ka Sikkim bad ka Arunachal kin ïakhun ha ka 21 tarik u Nohprah. Baroh lai tylli ki jingïalehkai kin sdang ha ka por 4 baje janmiet ha madan First Ground-SSA Stadium, Polo, bad ïa ki tiket yn die ha katei ka jaka ha ki sngi ïalehkai.
La jied ïa ki nongïalehkai na ki hynriew tylli ki klob trai ri ryngkat bad lai ngut kiba ïalehkai na ka bynta ki kynhun kiba don shabar jong ka Meghalaya. Ki la pyndonkam ïa kine ki khyndiat sngi ba khatduh ban ïa sngewthuh iwei ïa iwei pat bad ban tip ïa la ka jong ka kamram ha ka kynhun.
“Nga sngew sarong ba la ai ha nga ïa ka jingkitkhlieh ban long u kapten jong ka kynhun bad ka long ka burom ïa ngi baroh ban mihkhmat ïa ka jylla Meghalaya,” la ong u Hardy hadien ba la dep ban jied ïa ka kynhun ba pura. “Ngi don ïa ka kynhun ïalehkai kaba biang bha bad u coach uba tbit bha bad hap ban pynïahap ïa ka rukom ïalehkai jong u [coach Khlain Pyrkhat Syiemlieh].”
Ka SSA Stadium ka la sakhi ïa ka jingbun u paidbah ba pyndap ïa ki jaka shong ha ki jingïalehkai kiba kongsan jong ki lympung lehkai klob ka SSA ha Shillong bad na ka liang jong u Hardy u la buh ka jingkyrpad sha ki nongkyrshan, da kaba ong, “Khublei ïa ki paidbah kiba kyrshan ïa ngi ki nongïalehkai. Nga kyrpad sa shisien ïa ki ban wan ai mynsiem na ka bynta jong ngi, ha kane ka kynti ban ïalehkai na ka bynta ka kynhun jong ka jylla.”
U coach ka jylla, Bah Khlain Pyrkhat Syiemlieh u la kdew ïa ka jinglong rangbah jong u Hardy, ka jinglong nongïalam bad ka jinglah ban ïalehkai jong u ha ka klob Nongkseh mynta ka samoi, kaba la pynlong ïa u ban long uba kongsan tam ban long kapten.
U coach u la batai ba ka por ka long kaba lyngkot ban pynkhreh ïa ka Santosh Trophy hynrei ka MFA ka la pyrshang ban jied ïa ka kynhun kaba ïahap na ka bynta kane ka lympung ba pawnam bad u don ka jingshaniah kaba pura ha ki khynnah shynrang jong ka kynhun.
Tang ki kynhun kiba wan ha khlieh duh na ki khyndai tylli ki Group kin ïohrung sha ka wat ïakhun ba khatduh (final round). Nalor kine, ka West Bengal kaba la rah ïa ka nam lahduh ha u snem 2024-25, ka Kerala kaba wan ba ar bad ka Assam, ka jylla kaba pynlong ïa ka wat ïakhun ba khatduh (final Round), ki la ïohrung beit beit sha ka Round ba khatduh.
Kane ka pynlong ïa man la ka jingïalehkai kaba kongsan bad ka Meghalaya ka dei ban ïalehkai ïa ka jingïalehkai kaba bha tam naduh ka jingïakhun kaba nyngkong.

Ka thup kyrteng jong ka kynhun Meghalaya ki long:
Goalkeeper – Wanteilang Malngiang, Banshanskhem Kharsyntiew, Nister Roy Suting
Defender – Wanboklang Lyngkhoi, Apborlang Kurbah, Wilbert D Marbaniang, Iohborlang L Lyngkhoi, Allen Camper L Nongbri, Arlangky Nongsiej, Mebankhraw K Wahlang
Midfielder – Hamedamanbha Wahlang, Riborlang L Lyngkhoi, Babysunday Marngar, Dibormi Kassar, Mebanshngain Kurkalang, Fairming Suting, Robertson M Khongriah, Hardy Cliff Nongbri, Kynsaibor Lhuid
Forward – Shano Tariang, Deibormame Tongper, Dawanchwa C Challam
Support staff:
Khlain Pyrkhat Syiemlieh (Head Coach), Sailon Syngkrem (Assistant Coach), Dious Lapasam (Goalkeeping Coach), Cliff R Nongrum (Manager), Wanbokstar Syiemiong (Physio).