Pynbna ka MFA ïa ka kynhun ba pura ka ban mihkhmat ïa ka Jylla

Shillong, Naitung 16: Ka Meghalaya Football Association ka la pynbna ïa ka kynhun ïalehkai phutbol ba pura ka ban mihkhmat ïa ka Jylla ha ka Junior Boys’ National Football Championship 2025 (Tier 1) na bynta ka Dr BC Roy Trophy.
ïa kane ka lympung yn pynlong ha Amritsar, ha kaba ka kynhun ïalehkai jong ka Meghalaya ka la shah thup ha ka Group B ryngkat ka lahduh kaba ïada ïa ka burom ka West Bengal, Kerala bad ka Tamil Nadu. Ka kynhun ïalehkai jong ka Jylla kan ïakhun nyngkong pyrshah ïa ka Kerala ha ka 21 tarik Naitung.
Hadien ka jingïalehkai kaba nyngkong ka kynhun kan aireng ïa ka West Bengal ha ka 23 tarik Naitung, bud sa ka jingïalehkai ba khatduh pyrshah ïa ka Tamil Nadu ha ka 25 tarik Naitung.
Ki 20 ngut ki samla kiba la shah jied ki dei kiba dap da ka jingkyrmen bad kiba la pynpaw pyrthei ïa ka sap ba ki lah ban don bynta ha kane ka jingïakhun, bad yn ïalam ïa ki da u nonghikai uba la shemphang bha u Bah Seibor Sana.
Shuwa ba ka kynhun kan leit ban ïashim bynta ha kane ka lympung, na ka liang jong ka Meghalaya Football Association ka la ïoh ban pynlong ïa ka jingïalang kitbok kitrwiang kaba lyngkot hynne ka sngi Balang. Ha kane ka sngi la ïadonlang u President ka MFA u Bah Hamlet Dohling, u Vice President u Bah Cliff Nongrum bad u Bah Freddy Kharpran-Executive Member. Na ka liang jong kine ki dkhot ba rangbah jong ka synjuk ki la kitbok kitrwiang ïa ki nongïalehkai bad ki nongtrei (support staff) ba kin nang kiew shaphrang bad ki la ai mynsiem ruh ba kin ïakhun na ka bynta ka jingjop namar ki kit ïa ka jingkyrmen jong ka Meghalaya ha ki tyrpeng jong ki.
Haba phaidien, ka Meghalaya kam shym la lah satia ban ïaid shakhmat wat tang na ka group stage ha u snem ba ladep, hadien ba ka la wan ha ka kyrdan ba lai na ka Group C.
Ka thup kyrteng ka kynhun jong ka Meghalaya ki long:
Danehskhem Ronghang, Dasuk Banphrang Diengdoh, Skhemlang Marthong, Medonbanshan Kurkalang, Robindor Kyrsian, Venand Brandon Marboh, Baniar Kharsahnoh, Mewanpyntngen Lyngkhoi, Prosperwell Ryntong, Yeomanlyson Shadap, Shanborlang Khongjee, Melvinstar Lyngdoh Nongbet, Clifford Buam, Marc R Marak, Alvin Kharbani, Chanjib Chetry, Aiborlang Mulieh, Seibok Lyngdoh, Aryan Nongkhlaw, Thrisilbirth A Sangma
Support staff: Seibor Sana (head coach), Henry Marboh (assistant coach), Banshailang Sohtun (manager), Diangtihun Kharkongor (physio)
Ka prokram ïalehkai jong ka Meghalaya:
Pyrshah ïa ka Kerala, 21 tarik Naitung
Pyrshah ïa ka West Bengal, 23 tarik Naitung
Pyrshah ïa ka Tamil Nadu, 25 tarik Naitung