Shillong, Naitung 03: Ka samoi ïalehkai 2024-25, jong ki lympung ba hap hapoh ka jingkhmih jong ka BCCI kan dei ka samoi kaba kyrpang tam ha ka histori jong ka kynhun ïalehkai kriket kiba la rangbah jong ka jylla Meghalaya, bad na ka liang jong ka Meghalaya Cricket Association ka la pynbna ïa ka thup kyrteng jong ki 30 ngut ki dkhot ongïalehkai na ka bynta ki jingïalehkai ki ban sa wan.
Kane ka samoi kan long kaba sah jingkynmaw ïa ka Meghalaya ban shah thup ha ka Elite Category jong ka Ranji Trophy 2024-25 hadien ba ki la wan kyrdan ba ar na ka thup lehkai Plate Group ha ka samoi 2023-24, ka jingjop kaba khraw khamtam namar ba ka Meghalaya ka la pynmih madan da tang ki rangïalehkai trai jylla, da kaba pynduh ban pyndonkam ïa ki nongialehkai kiba nabar jylla.
Ha kane ka samoi lehkai jong ka Ranji Trophy (first-class) kan dei ka lympung ba heh kaba nyngkong na bynta ka kynhun ïalehkai ka Meghalaya, ïa kaba yn sdang ha ka 11 tarik u Risaw. Nangta kan bud sa ka lymnpung ‘T20 Syed Mushtaq Ali Trophy’ ka ban sdang ha ka 23 tarik u Naiwieng bad ka lympung One Day Vijay Hazare Trophy ka ban sdang ha ka 21 tarik u Nohprah.
Ka MCA hadien ka jingai jingmut jong ka ad hoc selection committee, ka la jied 30 ngut ki player na ka bynta kane ka samoi katkum ka jinglah jong ki ban ïalehkai ha ka samoi 2023-24 bad ruh lyngba ka jingïalehkai jied player kaba la long dang shen ha Jagiroad, Assam.
Ka MCA kan pynlong ïa ki jingïalehkai-bad jingpynkhreh (selection-cum-preparatory camp) shuwa ban sdang katei ka lympung, nalor kane, la kyntu ruh ïa ki player ban long phikir ïa la ka jong met ka phad bad ban long kiba ryntih ha ka por kilanmet bad ban pyntip sha ka MCA halor ka jingpynkhreh.
Kane ka thup kyrteng ka kynthup ïa ki player kiba la shemphang bha ha ka kriket, naduh ki player ba la kham rangbah kum u Wallambok Nongkhlaw haduh ki samla kiba la tyngshaiñ bha ha ka lympung U-23 ha ka aïom lehkai ba ladep kum u Nishanta Chakraborty. La kynthup ruh ïa katto katne ki player ba kynsai ba mih madan ha ka Ranji jong u snem ba la dep, kum u Kishan Lyngdoh, u Dippu Sangma bad u Akash Kumar Chaudhary.
Ki nongïalehkai MCA Senior Men kiba la shah jied kyrpang na bynta ka samoi lehkai 2024-25 ki long:
Chaman Pushp, Swarajeet Das, Aryan Borah, Bijon Dey, Nishanta Chakraborty, Jaskirat Singh Sachdeva, Adarsh Joshi, Kishan Lyngdoh, Arpit Bhatewara, Bamanbha Shangpliang, Himan C Phukan, Shambhalang Pyngrope, Wallambok Nongkhlaw, Anish Charak, Arbin Singh, Sylvester Mylliempdah, Riboklang Hynniewta, Rohit Shah, Akash Kumar Chaudhary, Ram Gurung, Robert Sangma, Pankaj Mandal, Roshan Warbah, Dippu Sangma, Ibitlang Thabah, Arien Bonchang Sangma, Yogesh Tiwari, Md Nafees Siddique, Chengkam Sangma, Lerry Sangma
