Shillong, Naiwieng 20: Da ka jingthmu ban dang kyntiew shuh shuh ïa ka jingïalehkai kriket hapdeng ki riewlum jong ka jylla, ka Apex Council jong ka Meghalaya Cricket Association ka la shim ïa ka rai ban kyrshan ïa ka Maitshaphrang Khasi League, kumba la pynbna ha ka taïew ba ladep, bad ha ka sngi Palei ka la pyntip ba kan kyrshan ruh ïa ka 1st Garo Hills Tribal Cricket League.
Ka lympung kriket kaba la tip da ka ‘Maitshaphrang Khasi League’ kadei ka lympung ïalehkai kriket T20 ba la pynlong da ka Khasi Students Union bad ka MCA kan ai jingkyrshan ha ka liang ka jingstad bad kiwei kiwei katkum ka jingdonkam.
Ha kajuh ka rukom, ka MCA ka la wad ki lad ki lynti na ka bynta ban pynlong ïa kum kane ka lympung ïalehkai ha Garo Hills, ha kaba u Symbud President ka MCA u Sengnab Momin u la ïalam ïa kane ka jingpyrshang. La pynlong ruh ïa ka jingïalang bad ki riew shemphang ha ka kriket bad ki nongmihkhmat (official) jong ki kynhun ba la ïasoh ha Alotgre Cricket Ground ha Tura ha ka 18 tarik u Naiwieng bad la thaw ïa ka komiti ban pynlong ïa kum kane ka lympung.
Ha kane ka jingïalang la mynjur ruh ban pynkhamti ïa ka Merry Souls Youth Club na North Garo Hills ban pynïaid bad pynlong ïa ka 1st Garo Hills Tribal Cricket League. Ia ki tarik ban pynlong ïa kane ka lympung, ka ban long ha Mendipathar, yn sa pynbna kham hadien.
Ka Apex Council jong ka MCA ka la pynpaw ka jingsngewnguh ïa baroh kiba la donkti ban shim ïa kane ka sienjam ban kyntiew ïa ka jingïalehkai kriket ha Garo Hills, ka ban long ka jingkyrshan kaba khraw ïa ki khynnah samla, ki nongïalehkai kiba don sap ban kyntiew ïa ka sap jong ki bad ban pynkhreh ïa ki ban mihkhmat ïa ka jylla ha ki kyrdan kiba kham halor.
