Shillong, Naiwieng 05: Ka Selection Committee na ka bynta ka kynhun ïalehkai kriket ki kynthei ba la rangbah jong ka Meghalaya Cricket Association ka la pynbna ïa ka thup kyrteng jong ki 15-ngut ki nongïalehkai ryngkat bad ki nongïalehkai ba la pynap lypa (standby) ki ban mihkhmat ïa ka Jylla ha ka BCCI’s U-23 Women’s T20 Trophy 2025-26 plate group.
Ka Meghalaya kan aireng pyrshah ïa ka Pondicherry ha ka jingïalehkai ba nyngkong ha ka 24 tarik Naiwieng. Baroh ki jingïalehkai kin pynlong ha Agartala.
Mynta u snem ïa ka kynhun yn long kapten da ka Monical L Phawa, katba ka Suriti Kumari Ray ka la shah jied ban long symbud kapten.
Ka prokram kilanmet ban pynkhreh ïa kane ka lympung yn pynlong naduh ka 07 haduh 20 tarik Naiwieng ha madan kriket jong ka Ri-Bhoi District Cricket Association kaba ha Pahamsning, Nongkhrah.
Kumta ki nongïalehkai bad ki support staff kiba na Khasi bad Jaintia Hills, kynthup ruh ïa ki standby, kin hap ban wan mih ha madan Polo, Shillong ha ka 06 tarik Naiwieng ha ka por 2 baje nohphai sngi shuwa ba kin mih ryngkat ban leit sha Nongpoh. Katba ki nongïalehkai bad ki standby kiba na Garo Hills kin hap ban wan beit beit sha Nongpoh ha ka 06 tarik Naiwieng. Nangta ka kynhun ïalehkai jong ka Meghalaya kan mih na Nongpoh ban leit sha Agartala ha ka 21 tarik Naiwieng.
Ka thup kyrteng jong ka kynhun Meghalaya ki long: Suriti Kumari Ray (VC), Monica L Phawa (C), Ankita Sharma, Sara D Kharbani, Pilika Marak, Monycable Marbaniang, Dianchidora Sangma, Retreki Pohshna, Neelam Roy, Janika Marak, Dubleen Nengnong, Abiezer Kharsyiem, Blaridahun Dkhar, Indariakor Kharwanniang, Nerisa Nongrum.
Standbys: Iaphilaribha Diengdoh, Mansi Anand, Fullnessy Mawlong, Jaylynn Marak, Rikmanchi M Sangma
Support staff: Hemant Roy (head coach), Pahara Mukhim (assistant coach), Sushma Thapa (physio), Apurva D Nandkarni (trainer), Sanjay Mandal (manager).
