Pynbna ka LTO&DA ïa ka ‘No Smoking Zone’ ha ki jaka ïeng kali, khang ban dih duma ha ki kali kamai

Nongpoh, Naiwieng, 11: Kum kynhun ki nongniah Kali kamai paidbah ha ka thain Nongoh kiba ju kamai na Nongpoh sha ka thaiñ Byrnihat mynta ka sngi ha ka lama jong ka Local Taxi Owners and Drivers Association (LTO&DA), Nongpoh Region, ka la shim syndon da ka sienjam kaba kham tyngeh da kaba pynbna ïa ki jaka ieng kali kum kata ka No Smoking Zone ban tehlakam ïa kito ki riew paidbah kiba ju dih duma ha ki jaka paidbah bad hapoh ki Kali kamai kiba ju pynkhein ïa ki kyndon aiñ jong ka Cigarettes and Other Tobacco Products Act-2003 (COTPA- 2003).
Ha ka jingïalang kaba la long mynta ka sngi ha Dorbar Hall Sajer Nongpoh, kane ka Association ym tang ba ka la pynbna ïa kata ka NO Smoking Zone, hynrei ka la sam ruh wat ïa ki ID jong ki Dribar ba kamai kali paidbah da kawei ka thong ban wanrah ïaka jingshngain na ka bynta ki paidbah kiba shong ha ki kali kamai paidbah.
Kumba la pynpaw da u President u Bah Vincent Sohkhwai, kane ka jingpynbna ïa ka No Smoking Zone ha Nongpoh bad ruh ka jingsam ïa ki IDC sha ki Dribar, ka dei ka thong jong ka seng ban bud ryntih ïa ki kyndon aiñ bym shah ban dih duma ha ki jaka paidbah ne ha ki Kali kamai bad la sam ruh ïa ki ID sha ki Dribar ban pynthikna ïa ka jingshngain ki nongleit nongwan haba ki la don ïa kata ka ID kaba la buh kyrpang da ka Association.
U la ong ruh ba kane ka jingdih duma ka ktah shisha ïa ki paidbah kiba leit ba wan khamtam ki khyllung ki khynnah bad ki Longkmie ba armet, namar ka jingdih duma kam ktah tang ïa u nongdih bad ka ktah ruh ïa kiwei lyngba ka tdem kaba u pynmih haba u dih duma.
Namarkata, ka Association ka sam ruh ïa kine ki ID sha ki Dribar ka long ban pynthikna ban don kata ka jingshngain bad lada ki paidbah ki don kano kano ka jingeh ki lah ban ujor ne phone sha ki Helpline Number bad la leh ruh ïa kane na ka daw ban tehlakam ïa ki kam sniew kiba la ju jia na ka por sha ka por haba ym don kata ka jingpyrkhing ne peit bniah ïa ka leit ka wan ki paidbah.
Ha kane ka sngi ba la pynbna kum kita ki No Smoking Zone la shim bynta ruh da u Akash R Marak Assistant Commissioner ka Ri-Bhoi District kum u kongsan bad ryngkat ka jingdon lang u Bah John P Nongrang MVI ka tnad Transport, Dr W Hynniewta Senior Dental Surgeon Civil Hospital Nongpoh, u Rubul Ali In charge ka Nongpoh Traffic Police, u Kamrul Islam OC Umsning Police Station, u Bah Jayson Lennox Nongrum President ka RBPC, ki nongïalam ka Association bad kiwei kiwei.
Haba ai jingkren ruh ha kane ka sngi kum u kongsan, u Akash R. Marak, u la ai ka jingïaroh ïa kane ka Association kaba la shim ïa kane ka sienjam ban pyrkhing ïa ka jingdih duma ha ki jaka paidbah ne ha ki Kali kamai paidbah, namar ka ka ktah shisha ïa ka koit ka khiah ki paidbah bad ruh kaba long ka jingpynkhein ïa ki kyndon ain kiba khang ban dih duma ha ki jaka paidbah.
Shuh shuh, u la ong ruh ba ka bor synshar district kan ai ka jingïatrei lang halor kine ki kam babha ba la leh da kane ka Association bad u kyrmen skhem ruh ba da ka jingïatrei lang ki paidbah lah ban tehlakam ïa ka jingdih duma ha ki jaka paidbah kaba long ka jingshah ktah ïa ka koit ka khiah jong kiwei ki bym dih duma, u la bynrap.