Pynbna ka JNC ïa ki 5 tylli ki mat ha ka Save Jaiñtia Mission

Shillong, Nohprah, 14: Ka Jaiñtia National Council (JNC) kum shi bynta ban pynjanai ïa ka jingshakri ïa ka jaitbynriew Hynñiewtrep Hynñiawwasa khamtam eh ïa ka rilum Jaiñtia, ka la rai ban pynsdang noh da ka Save Jaiñtia Mission bad hapoh kane ka mishon ki don san tylli ki mat ki jura kiba ka seng ka la sngewdei ban pynkhih win na ka bynta ka pateng jong ka rilum Jaiñtia.
Ha ka jingïakren bad ki lad pathai khubor ha ka sngi Saitjaiñ, u President jong ka seng u Bah Sambormi Lyngdoh u la ïathuh ba ki san tylli ki mat ki kynthup ïa ka jingpynkhlaiñ ïa ka jingtreikam jong ka Jaiñtia Hills Autonomous District Council (JHADC), ban dawa na ka bynta ban pynrung ïa ka ktien Pnar ha ka State Anthem jong ka jylla Meghalaya bad ha ka Meghalaya State Languate Act, ban dawa ïa ka Sorkar Jylla ban thaw noh da ka polisi thungkam thungjam hapoh ki karkhana dewbilat na ka bynta ka jingmyntoi jong ki trai ri trai muluk, ban ïapynbeit noh ïa u pud u sam hapdeng ka jylla Meghalaya bad ka jylla Assam da kaba pynshong nongrim ïa ka “Pre 1951 Jaiñtia Hills Map,” bad ban dawa ïa ka Sorkar ba kan shna noh da ka Small Scale Mining hapoh ka jylla Meghalaya.
“Ha kine ki sngi ngin sa leit ban ïakynduh ïa u Myntri Rangbah ban rah ïa ka “Pre 1951 Jaiñtia Hills Map’ ban aiti sha ka Sorkar,” la ïathuh u Bah Lyngdoh.
“Haba ngi phai sha ka JHADC ngi ïoh i shibun ki jingtlot bad ki jing dkhoh ha rukom treikam jong ka. Kum ka seng kaba don ka jingkitkhlieh na ka bynta lawei jong ki khun u Hynñiewtrep Hynñiewwasa, khamtam naka bynta ka rilum Jaiñtia, ngi sngew ba ka por ka ladei ïa ngi ba ngin mihshakhmat ban leit sha u paitbah bad ban pynshai na ka bynta ka jingdonkam ban pynkhlaiñ ïa ka JHADC,” ong u President ka JNC.
“Namarba lada phai shadien ngi ïohi ba ka jingtlot jong ka JHADC ka sdang na ka jing bakla jong ngi ki paitbah ban jied ïa ki MDC,” u la ong bad kynnoh, “kumba ka long mynta ki MDC ki dei tang ki nongbud jong u MLA bad kumjuh ruh ki long tang kum ka vote bank jong ki MLA,” u la ong.
“Ngi sngewkmen ba ka Sorkar India ka la ithuh kyrpang ïa ngi lyngba ka Sixth Schedule hynrei ngi sngewsih pat ban ïohi ba ki nongmihkhmat jong ngi khamtam ki MDC kim don ïa ka jing kitkhlieh na ka bynta ka lawei jong ka ri bad ka jaitbynriew,” la bynrap u Bah Sambormi Lyngdoh.
Ha kaba ïadei bad ka jingdawa ban pynrung ïa ka ktien Pnar ha ka Meghalaya State Anthem bad ha ka Meghalaya State Language Act, u Bah Lyngdoh u la ong, “ka ktien Pnar ka dei ka ktien kaba la shaphriang bha ha kylleng ki jylla ka thaiñ Shatei Lammihngi bad ka dei ruh ka ktien jong ki nong Jaiñtia, ngim lah ban ong ba ka ktien Pnar ka dei ka ktien shnong namar wat hapoh ka JHADC ruh ki ïakren da ka Ktien Pnar.”
“Kum ki nong Jaiñtia ngi sngewsarong ba ngi don ïa la ka jong ka histori bad ngi don ïa ki khlawait ka Ri. Hynrei ngi sngewsih pat ba ngim don ïa ki dak thoh naduh por mynshwa, tangba ka jingkyrmen ka la wan ha ngi ki nong Jaiñtia kiba kren da ka ktien Pnar namarba lyngba “Ka Seiñ i Ktien wei Thoh Jaiñtia” kaba la lah ban pynwandur ïa ki dak thoh Pnar bad dei ha u snem 2021 ba ka JHADC ka la mynjur ïa ka rai ban ithuh noh ïa ki dak thoh Pnar,” u la ong.
U la ong ruh ba ka seng ka la kyndit katlah katïai ban ïohi ba ka Sorkar Jylla haba pynmih ïa ka State Anthem lyngba ka tnat Art & Culture kam shym la kynthup lang ïa ka ktien Pnar hapoh kane ka Anthem. “Kane ka jingleh jong ka Sorkar ka pynsngewsih ïa ngi ki nong Jaiñtia bad haba ngi pynpaw ka jingsngew pyrshah halor kane ka Sorkar Jylla ka la aidaw ba la thaw ïa ka State Anthem katkum ka State Language Act,” u la ong shuh shuh.
“Dei na kane ka daw ngi kum ka seng ngi sngew ba ka long kaba donkam ban ithuh noh ïa ka ktien Jaiñtia hapoh ka State Language Act khnang ba kan ym don ka jingnoh shilliang hapdeng ki Khasi, Jaiñtia bad Garo,” la pynpaw u Bah Lyngdoh.
U la ïathuh ruh ba ha ka Save Jaiñtia Mission, ka seng kan sa leit tohkit ïa ka jong ki nongtrei bylla ha ki karkhana dewbilat kiba don ha East Jaiñtia Hills District shwa ban aiti da ka jingthoh sha ka Sorkar ban dwa ba ka dei ban thaw noh da ka polisi thungkam thungjam ba lah ban pyntreikam ha ki karkhana pynmih dewbilat na ka bynta ka jingmyntoi jong ki samla trai ri trai muluk.
Haba kylli u la ong, “watla ki nongpynïaid karkhana dewbilat ki la ïasoi ïa ka soskular bad ki Dorbar Shnong hynrei kaba sngewsih ka long ba ki samla jong ngi kiba la nang la stad hapoh rilum Jaiñtia kim ïohkam ïohjam satia ha kine ki karkhana hynrei ïa ki kam la ai sha ki briew kiba nabar ka jylla.”
“Ha ka jingshisha ka jingdon jong ki karkhana pynmih dewbilat ka dei ban long ka lad ïohkam ïohjam ïa ki khun samla ha ki tnat bapher, hynrei kumba ka long mynta ngi ïohi ba ka jingdon jong kine ki karkhana pynmih dewbilat ka plie lad pynban ïa ki bar jylla ban ïohkam ïohjam, ha baroh ki tnat kiba don hapoh kine ki karkhana,” u la bynrap.
“Ka East Jaiñtia Hills ka don haduh 10 tylli ki karkhana kumta na ka bynta ka jing myntoi jong ki trai ri trai muluk ngi dawa na ka Sorkar Jylla ban thaw noh da ka Job Recruitment Policy ha kine ki karkhana na ka bynta ki trai muluk,” ong u nongïalam ka JNC.
U la ong ruh ba ka seng ka la dawa ïa ka Sorkar Jylla ban ïapynbeit noh ïa u pud u sam hapdeng kiba don ha rilum Jaiñtia kiba ïatyngkhuh bad ka jylla Assam da kaba pynshong nongrim ïa ka “Pre 1951 Jaiñtia Hills Map” bad ba ka Assam ka dei ban pynphai noh ïa ki shnong kiba shah klun dei ban pynphai biang sha Meghalaya.
“Haba ngi ïakren ïa ka rilum Jaiñtia, ngim lah khlem da phai dien sha ka histori jong ka Hima Jaiñtia, kawei na ki Hima kaba ïar ha u pud u sam ha ki por ba dang shynshar u Syiem Jaiñtia. Shwa ka jingsynshar jong ki Phareng ka rilum Jaiñtia ka dei shi bynta jong ka Hima Jaiñtia katkum ka histori,” la pynpaw u Bah Lyngdoh.
Ngi dawa ruh ïa ka Sorkar ban shna noh da ka Small Scale Mining namarba ba ka jingtih marpohkhyndew kaba mynta ka dei ka Open Cast Mining kaba uno uno uba kwah ban tih dewiong u hap ban aplai ïa ka Prospecting License bad u donkam ïa ka jaka kaba heh ym duna ïa ka 100 hectare, hynrei ka rukom trei dewiong shwa ban khang ka National Green Tribunal (NGT) bun na ki par dewiong ki dei kiba rit,” u la ong.
“Na ka bynta ka jingmyntoi jong ki rit ki ria, ngi sngewdonkam ba ka Sorkar Jylla ka dei ban shna noh da ka Small Scale Scientific Mining,” ong u Bah Lyngdoh.