Pynbna ka FASToM da ka jingïakhih khlem pud sngi ba pulom ka jingïakren bad ka Sorkar

Shillong, ïaïong, 22: Ka Federation of Federation of All School Teachers of Meghalaya (FASToM) ha ka sngi Thohdieng ka la pynbna ban pynlong sa da ka Non-Cooperation Movement kaba khlem pud sngi hadien ba ka jingïakren bad ki Heh Ophisar jong ka tnat Pule Puthi mynta ka sngi Thohdieng ka la seisoh satia.
Shwa ban pynbna ïa ki jingïakhih, ki nongïalam ka FASToM hapoh ka jingïalam jong u Nongaitktien u Bah Mayborn Lyngdoh ki la shah khot ban ïakren bad u Commissioner & Secretary ka tnat Pule Puthi u Dr. BDR Tiwari ha ryngkat ka jingïadonlang jong u Secretary ka tnat Pule Puthi u Ambrose Ch. Marak ban ïathir ïatai halor ka jingdawa ban kyntiew kyrdan Deficit ïa ki skul Adhoc kiba don 2, 248 tylli tam.
Ki rai jingïakhih kiba ka FASToM ka la pynbna ki long, ban ym leit shim klas sha skul, ban ym leit sha ki jaka pynbeit ïa ki jubab thoh eksamin jong ki khynnah skul kiba ïakhun ïa ka eksamin SSLC bad HSSLC bad ban ym ïashim bynta ha kino kino ki jingbthah kam jong ka Sorkar ïa ki nonghikai skul Adhoc.
Shwa kane, ki nonghikai kiba la ïalum ha madan Malki ha ka por mynstep kiba wan na rilum Khasi, Jaiñtia bad Garo kim shym la pynlong satia ka jingïalang hynrei ki la mih na madan ban leit shong kyllaiñ myngngor hakhmat ka ophis jong ka Meghalaya Board of School Education (MBoSE), Shillong. Hynrei katba dang ïaid rally, ki nonghikai ki la ïapra ar kynhun, kawei ka kynhun kaba kham khyndiat ngut ryngkat bad ki nongïalam ki la leit beit sha Ophis ka MBoSE katba kiwei pat kiba ym duna palat ïa ka ar hajar eiei ki la leit sha Secretariat.
Ka jingpoi jong ki nonghikai hakhmat ka ophis Secretariat ka la pynking janor ïa ki bor synshar ka East Khasi Hills District bad ïa ki Pulit pahara namarba ka katkum ka jingpan jingbit jong ka FASToM na ka ophis jong ka Deputy Commissioner ka East Khasi Hills District ka long tang ban shu ïalum ha Madan Malki bad ban ïaid rally haduh ka ophis treikam jong ka MBoSE.
Watla ki Magistrate kiba la pynbor ïa ki nongïalam jong ka FASToM ban phah noh ïa ki nonghikai kiba don ha Secretariat bad hakhmat ka MBoSE sha Madan Malki hynrei ki nongïalam ki la pyneh bad pynphai nia da kaba ong, “ngin ym mih na kane ka jaka tad haduh ba ngin da ïoh jubab na ka Sorkar.”
Katkum ka jingai jingkheiñ jong ka FASToM, ki nonghikai Adhoc ki don 1116 ngut ha Lower Primary, 3376 ngut ha Upper Primary, 2164 ngut ha Secondary, 388 ngut ki Nonghikai Science, 192 ngut ki Nonghikai Hindi bad 434 ngut ha ka Higher Secondary.
Ha ka dorkhas ba la aiti sha u Myntri Rangbah ka Jylla u Conrad Kongkal Sangma lyngba u Commissioner & Secretary u Dr. BDR Tiwari, ka FASToM, ka la ong, “namarba u Myntri ka tnat Pule Puthi u Bah Lahkmen Rymbui lyngba ki lad pathai khubor u la kren ha u Naiwieng, 2021 ba ka Sorkar Jylla kan ym lah ban kyntiew kyrdan Deficit System lane Deficit Pattern ïa ki nonghikai skul Adhoc. Namarkata, ka Federation ka la rai ban tyrwa da ka jingpynkiew tulop kaba marbiang da T.18 hajar ïa baroh ki nonghikai skul Adhoc katkum ki kyrdan kaba ki hikai.”
Ka Seng ka la tyrwa ruh ba dei ban pynkiew ïa ka jingsiew kaba 5% manla u snem bad ka jingsiew tam ïa ki Principal jong ki skul ïa kaba la aiti sha u Secretary ka tnat Pule Puthi ka Sorkar Jylla ha ka 18 tarik, Kyllalyngkot, 2022.
Katkum ka jingai jingkheiñ jong ka FASToM, lada ka Sorkar Jylla kan kyntiew kyrdan Deficit Pattern ïa ki skul Adhoc naduh Lower Primary haduh Higher Secondary ka Sorkar kan hap ban pynlut sa T.211.49,54, 064 klur shi snem na kaba pynlut mynta tang T.158, 33,28,000 klur.
Katba lada kyntiew kyrdan Deficit System, ka Sorkar kan hap ban pynlut T.257,36, 45, 148 klur shi snem na kaba siew baroh shikatta T.158, 33, 28, 000 klur.
Ki nonghikal skul Adhoc ha Lower Primary ki ïoh tulop shibnai T.12,000 hajar, Upper Primary T.16,000 hajar, Secondary T.20,000 hajar, ki Nonghikai Science T.22,000 hajar, ki nonghikai Hindi T.12,000, ki nonghikai Higher Secondary T.24,000 hajar.
Katkum ka jingtyrwa jong ka FASToM lada pynkiew da ka tulop kaba T.18 hajar ïa baroh ki nonghikai naduh Lower Primary haduh Higher Secondary ka Sorkar kan hap ban bei jinglut T. 165,67,20,000 klur shi snem.
U Bah Mayborn Lyngdoh ha ka jingïakren bad ki lad pathai khubor hadien ba la wai ka jingïalang bad ki Ophisar ka tnat Pule Puthi u la ong, “ka jingïakren kam shym la long kaba seisoh hynrei kaba thylli kum u khiewphiang u bym don um. Ka jingdawa jong ngi ka la long naduh u snem 2019 ba ka Sorkar Jylla kan kyntiew kyrdan Deficit System ne Deficit Pattern ïa ki nonghikai skul Adhoc, hynrei haduh mynta ka Sorkar kam shym la sngap satïa.”