Pynbna ka ECI ban pynlong Bye Election ha Gambegre, 13 tarik, Naiwieng yn thep vote

Shillong, Risaw, 15: U Chief Electoral Officer (CEO) jong ka Jylla u Dr. BDR Tiwari ha ka sngi Baar u la pyntip paidbah ba ka Election Commission of India (ECI) ka la pynbna ban pynlong ïa ka elekshon shiteng samoi ha Gambegre Assembly Constituency ha ka 13 tarik, Naiwieng, 2024.
Ha ka jingïakren bad ki lad pathai khubor, u Tiwari u la pyntip ba ka sngi thep kyrteng khatduh kan long ha ka 25 tarik, Risaw, 2024, katba ka jingbishar ïa ki kyrteng kan long ha ka 28 tarik, Risaw, 2024 bad ha ka sngi khatduh ban weng ïa ki kyrteng kan long ha ka 30 tarik, Risaw, 2024. Ka jingñiew ïa ki vote kan long ha ka 23 tarik Naiwieng, 2024.
Kum ban shu pynkynmaw hangne ba ka jingpynlong ïa ka elekshon shiteng samoi ha Gambegre Constituency ka long hadien ba u MLA barim ka Congress u Saleng A. Sangma u la resaiñ noh kum u MLA hadien ba u la jop ïa ka elekshon Lok Sabha na Tura Parliamentary Constituency kaba la long mynta u snem.
U Tiwari u la pyntip ruh ba ka Model Code of Conduct (MCC) kan treikam noh mardor tang ha West Garo Hills District da ka jingpynbna ïa ka tarik pynlong elekshon naduh kane ka sngi.
U la pyntip ruh ba ki nongthep vote ha Gambegre Constituency ki don 32,157 hajar ngut, 16,333 ki dei ki nongthep vote shynrang bad 15,824 ki dei ki nongthep vote kynthei, 3 ngut ki Service Voter, 64 ngut ki nongthep vote ba la rangbah, 100 ngut ki nongthep vote ba don jingduna ha ki dkhotmet.
Ki Polling Station ki don baroh 51 tylli. 31 tylli ki Polling Station ki dei kiba kham jynjar ka leit ka wan.
“Ka tnat Election ka long kaba la pynkhreh ban pynlong ïa ka elekshon kaba ïaid beit ïaid ryntih.
U CEO u la ïathuh ba ka tnat pynïaid elekshon hapoh ka Jylla kan sa pan bor pahara na ka bynta ban pynïaid beit ïa ka elekshon ha Gambegre.
Ka National People’s Party (NPP) kaba bat ïa u lam synshar hapoh ka jylla ka la rai ban pynïakhun da ka Mehtab Chandee Sangma kaba dei ka kurim jong u Myntri Rangbah ka Jylla u Conrad K. Sangma, katba ka TMC ka la rai ban pynïakhun da ka MDC jong ka GHADC na Dengnakpara ka Sadhiarani M Sangma kaba dei ka kurim jong u MLA barim ka Rangsakona u Zenith M Sangma.
Katba ka Congress bad ka Bharatiya Janata Party (BJP) haduh mynta kim pat pynbna satia ïa ki kyrtong ban pynïakhun ïa ka elekshon.