Shillong, Rymphang 18: Ka tnat District Council Affair (DCA) ka la pynbna ïa ki jaka ñiew vote ha Khasi Hills Autonomous District Council (KHADC) na ka bynta ka sngi ñiew vote ha kane ka elekshon MDC ka ban long ha ka 24 tarik mynta u bnai.
Ha ka jingpynbna kaba la pynmih ha ka sngi baar kaba la ong ba ka jingñiew vote na ka bynta ka Jirang, Nongpoh, Mawhati, Umsning bad Umroi constituency yn pynlong ha NSCA Indoor Stadium, Nongpoh Ri-bhoi District.
Ka jingñiew vote na ka bynta ka Sohryngkham, Mawkynrew, Nongkrem, Mawsynram, Mylliem, Laban-Mawprem, Nongthymmai, Laitumkhrah-Malki, Mawkhar-Pynthorumkhrah, Jaïaw, Mawlai, Mawphlang-Diengïei bad Nongspung-Sohïong constituency kan long ha Inter State Bus Terminus (ISBT), Mawlai Mawïong, Shillong.
Na ka bynta ka Lyngkyrdem-Laitkroh, Nongskhen bad Shella constituency kan long ha Sub-Divisional Officer (Civil), Pynursla Civil Sub-Division, Pynursla, na ka bynta ka Shella bad Sohra constituency, ka jingñiew vote kan long ha New Conference Hall, ha ophis Sub-Divisional Officer (Civil), Sohra Civil Sub-Division, Sohra.
Ha Eastern West Khasi Hills, ka jingñiew vote na ka bynta ka Mairang- Nongkhlaw bad Parïong-Mawthadraishan constituency kan long ha Multipurpose Hall, ha ophis Deputy Commissioner, Mairang.
Ha South West Khasi Hills, ka jingñiew vote na ka bynta ka Mawkyrwat bad Langrin constituency yn pynlong ha ophis Deputy Commissioner South West Khasi Hills District bad ha West Khasi Hills, ka jingñiew vote na ka bynta ka Nongstoiñ, Rambrai-Jyrngam bad Mawshynrut constituency ka jingñiew vote kan long ha ophis Deputy Commissioner Nongstoiñ.
