Pynbna ka Congress da u MDC ban ïakhun pyrshah ïa u President ka UDP

Mairang, Naiwieng 28: Hadien ka jingbymthikna kaba la bun bun bnai bad ryngkat ka jinglynga na kiba bun,khatduh ka Seng Congress mynta ka sngi, ka la pynbna ba u Kyrtong jong ka Seng na Mairang Constituency ban ïakhun pyrshah ïa u President jong ka UDP, u Bah Metbah Lyngdoh. Une u Kyrtong udei u Bah Batskhem Ryntathiang, u MDC jong ka Nongkhlaw- Mairang, uba ha ka elekshon MDC ha u 2019, u la tam palat san hajar vote ïa u kyrtong ka UDP, uba long ruh u sitting MDC.
ïaka rai ba u Bah batskhem Ryntathiang un ïakhun naka seng Congress la pynbna paidbah da u president ka MPCC u Bah Vincent H. Pala haka jingïalang kaba la long haka shnong Mawshut kaba hap hapoh ka Eastern West Khasi Hills District ha baka daki spah ngut ki nongkyrshan ka seng congress kila poi sha kane ka jingïalang. La ïathuh ruh ba kiba bun ki nongkyrshan jong ka Seng Congress kiba la iehnoh ïaka Seng ha ka election MDC kila wan phai biang mynta ban nang pynkhlaiñ shuh shuh ïaka Party.
U Bah Vincent H. Pala haba kren ha kane ka jingïalang u la ong ba kiba bun ki Seng Saiñpyrthei kila wan khroh ïa u Bah Batskhem ban ïakhun noh naka Seng jong ki hadien ba kila ïohi ba une u MDC u don ïaka thong ban jop ïaka election na Mairang Constituency ha u snem 2023. Hynrei u Bah Batskhem, u la jied ban ïakhun na ka Congress bad ka Seng ruh kala long kaba donbok shisha ban ïoh ïa u Kyrtong kum u bah Batskhem u ba skhem ka nongrim bad ka seng Congress.
U bah Pala ula ong ba ka seng congress kan jop ym duna ïaka 32 ngut ki MLA ha ka election ha u snem 2023 bad u la ong haba mih ki 12 ngut ki MLA naka Congress kala long ka jingdiaw ïa u kum u President hynrei phewse ka jingmih jong ki ka long pynban ka jingkyrkhu ha kaba haka jaka jingki la mih pynban da kiba kham stad shuh shuh ban ïa kito kiba la mih naka seng.
U MP ka Shillong, u la ther tyngeh ruh ïa ka sorkar MDA da kaba ong ba haka jingsynshar ka sorkar MDA ka jingbamsap kala shyrkhei haduh katta katta ha ka jylla bad ban rat diengkong ïa kane ka jingbam sap dei ban pynkylla ïaka rukom shynshar ban ym ai lad shuh ïaka ne ka Sorkar MDA ban shynshar biang ïaka jylla.
U Bah Batskhem haba kren ha kane ka sngi, u la ai khublei ïaki paidbah kiba la ai lad ïa u ban long u nongmihkhmat ban shakri ïaka Mairang Constituency kum u MDC ha kine ki 3 snem shiteng kiba la leit noh bad u la ong ba u la pyrshang ban ïadon bynta bad ki paidbah haki por baroh wat haka por kaba lyngkot. U la ïathuh ruh ba ha kaba ïadei bad ka Skhim ula ai kumba dei ban ai hynrei namar ka Skhim MDC ka long ka barit ki dang don ki bym pat ïoh lut hynrei kim dei pat ban sngewsih bad kin long kiba ïaishah. U la ong ba um shym la rung ha kane ka kam nongmihkhmat ban ïoh ïaka jingmyntoi shimet hynrei u la rung ha kane ka kam ban kyntiew ïaka long briew man briew bad ba ka hok sa shisien pat kan im haka imlang ka sahlang. U la ong ruh ba lada kum ki paidbah ki ïohi ba kum ki nongialam ki la pyndep hok ïaka kamram, ka mut ki la shah shkor ïa kaei kaba ki paidbah phi ud. Kumta ki paidbah kim dei ban peit than ïa ki jingduna kiba rit ba ria jong ki nongmihkhmat.U la ong ba kum u nongmihkmat u ïeng haka nongrim jong ka jingkitkhieh bad um shym la rung sha ka kam saiñ hima sima naka bynta ka spah,ka nam bad ka burom hynrei u la rung ban long ka nuksa, ban ïoh ban ai ïaka jingshakri, ban wanrah ïaka rukom treikam ka ba thymmai, ban long ka jingshai bad ban long ka jingkyrmen naka bynta jong ki paidbah bad jong ka jylla hi baroh kawei.
Kiwei pat ki nongkren haba kren ha kane ka sngi kila pynrem ïaka rukom treikam ka sorkar MDA hapoh ka jingialam ka NPP,UDP, BJP bad kiwei ki seng kiba rit da kaba ong ba hapoh ka jingïalam kane ka sorkar ka jylla la hiar arsut la ka long haka ka ïoh ka kot, ka pule ka puthi bad wat ka shong suk shongsaiñ ruh kala hiar naduh ba synshar kane ka Sorkar MDA. Ki la ong ba baki paidbah ki angnud ban shynshar ka Congress ïaka jylla hynrei kim mon pat ïa u Dr.Mukul ban don haka Party, kumta ka seng kala hiar hapoh ka jingialam u Dr.Mukul hynrei mynta bym don shuh u Dr.Mukul ha ka Congress, ka Seng kala ïoh iaka jingkyrshan kaba pura naki paidbah ka jylla bad khlem artatien ka Seng Congress kan jop bun ki MLA ha u 2023.
Da kane ka jingpynbna ka Congress ïa u Bah Batskhem ban long u Kyrtong jong ka, ka Mairang mynta ka la don lai ngut ki Kyrtong, kata u Bah Metbah Lyngdoh jong ka UIDP, u Bah Batskhem Ryntathiang jong ka Congress bad u Bah Shanlang Warjri jong ka VPP.