Pynbna ka Ashraya Hastha Trust bad Smile Train India ïa ka jingshakri ba san snem kynthih

Shillong, Naitung 23 : Ka Ashraya Hastha Trust, kaba long ka seng treikam mon sngewbha na Bangalore ba la bei tyngka da uwei u nongseng ka Infosys U K. Dinesh bad ka iing ka sem jong u ryngkat bad ka Smile Train India, kaba long ka seng treimon sngewbha ban ïarap ïa kiba kad shyntur kaba heh tam ha ka ri ka la pynbna ban ïatehlok ba san snem kynthih da ka jingthmu ban kyntiew ïa ki lad ai jingïarap na ka bynta kito kiba kad shyntur ha India. Kane ka jingïatehlok kan phai khmat sha ki kam kiban kyntiew ïa ki lad ai jingsumar na ka bynta kiba kad shyntur ha ki hynniew tylli ki jylla ba la dep ban jied, ha kajuh ka por ban nang kham pynbha shuh shuh ïa ka jingai jingsumar ba kan long kaba shngain bad kaba biang nadong shadong ban sumar ïa kane ka jingshitom.
Ka Ashraya Hastha Trust kan ai jingkyrshan haduh 10,000 tylli ki jingpuid ïa kito kiba don ïa ka jingshitom kad shyntur, yn ai jingkyrshan ïa ki san tylli ki jinghikai pyntbit bad ban buh ïa ki tiar ki tar kiba shngain ban leh ïa ki jingsumar ha ki jaka sumar jong ka Smile Train treatment center ha kylleng ki hynniew tylli ki jylla kynthup ïa ka Madhya Pradesh, Bihar, Assam, Meghalaya, Arunachal Pradesh, Uttarakhand bad Jammu & Kashmir. Baroh ki jingsumar kiban leh ha ka Smile Train Cleft Program ha Woodland Hospital, Shillong, yn ai jingkyrshan hapoh kane ka jingïatehlok na ka bynta ki san snem ban wan.
Haba kren shaphang kane ka jingïatehlok, I Dr. Werlok Kharshiing, Medical Superintendent & Plastic Surgeon, Woodland Hospital, Shillong I ong, “Ngi ha Woodland Hospital, da ka jingkyrshan jong ka Smile Train India ngi la lah ban sumar ïa ki nongpang kiba shitom kad shyntur naduh ka snem 2007. Ngi sngewnguh ba ka Ashraya Hastha Trust kala kner ka jingïarap na ka bynta ban puid, ban ai jinghikai bad ban ai ïa ki tiar ki tar kiban ïarap ïa ngi ba ngin lah ban sumar ïa ki hajar ngut ki khynnah kiba donkam ïa kane ka lad ai jingsumar ha ka rukom kaba shngain.”