Pynbiang noh ki Doktor khmat bad ki Doktor Specialist hapoh Ranikor CHC, dawa ka FKJGP

Mawkyrwat, Rymphang 03 : Ka Federation of Khasi Jaiñtia Garo & People (FKJGP) hapoh ka jingïalam jong u Balse Kharbani, Working President ka Ranikor Circle-cum-General Secretary ka FKJGP South West Khasi Hills District, bad u bah Teinam Nongtnger, ki la ïoh ban leit jurip ïa ka Ranikor CHC bad kynduh ïa u Medical Officer kata u bah Nathaniel Nongkynrieh.
Shuh shuh la ong ba ha ka jingïakynduh ka seng ka lap bun ki jingduna naduh ha kaba u Doktor ban peit ïa ki nongpang khmat ruh u don tang uwei bad khamtam ki Doctor specialist lei lei ki duna.
Na ka liang ka seng ka la ïoh ruh ban ïa kren ha kaba ïa dei bad ka ultra sound, hooid ka la don hynrei ki la ïoh jingtip ba ka dei beit tang ïa kiba ar met namar u ba dei peit ïa kane ka ultra sound u dei beit tang ïa ki ar met, kumta ka wan rah jingeh kiba pang ba shitom ki hap ban leit leh ïa ka ultra sound haduh shillong.
Kumta ka seng ka dawa na ka sorkar ba ka dei ban wanrah sa ar ngut Doktor ki ban peit tang ïa ka ultra sound khnang ba baroh ki nongpang kin ïoh jingmyntoi na kane ka test ba kim donkam shuh ban leit kiew haduh Shillong. Ha kaba ïa dei bad u pharmacies ki la lap ba haduh mynta ymdon hynrei la shu ïarap da ki Staff Nurse bad ki Doctor hi bad kumba long mynta ki dawai da shin ruh kim biang ba bun ki nongpang ki hap ban leit thied hi na ki pharmacy bad u nongñiah ïa ka kali kit nongpang ne ka Ambulance ruh ymdon bad kane ka wanrah jingeh ïa ki paidbah kiba thiah pang khamtam kito kiba shitom jur kiba hap ban pynkynriah hapoh Civil Hospital Mawkyrwat ne ha Shillong lane ha kiwei ki jaka sumar.
Ym tang kata, haba ïa dei bad ka jingplie u Myntri Rangbah ka Jylla Meghalaya ïa ka Operation Theater Room, ka seng ka kyntu ïa u Myntri Rangbah ban pynbiang noh kloi ki tiar haba ïa dei bad kane ka bynta bad ban wan rah ruh ki Doktor kiba dei peit ïa ka kam puid (Dr surgery) namar lada ym don Doktor kam don jingmut ban don ka kamra puid.
Haba ïa dei bad ka ulta sound u Dr. Nathaniel u la ïathuh ruh ba kane ka kamra puid ka dang dei beit tang ïa kiba armet ym ïa baroh ki nongpang, haba ïa dei bad ki jaka sah ki staff (quater) ba bun ki la jot ha por slap lei lei ki don ruh kiba la pei bad rung um bad kane ruh ka wanrah jingeh ïa ki nongtrei namar ba ki la kham bun (manpower). Kumta ka seng ka dawa na ka sorkar lyngba ka tnad ka koit ka khiah ba kan shimkhia halor kine ki jingduna hapoh ka CHC Ranikor.