Pynbiang noh ïa ki jingduna ha Civil Hospital Mawkyrwat ba ki paidbah kin kham suk: FKJGP

Mawkyrwat, K’lyngkot, 21: Ka FKJGP, South West Khasi Hillls District ha ka sngi Baar ka la leit ban ïakynduh ïa ka Medical Superintendent ka Dr. M. Lyngdoh ha Civil Hospital Mawkyrwat, South West Khasi Hills District na ka bynta ban ïoh jingtip kaei ba kane ka jaka sumar nongpang ka dang donkam ban pynbiang shuh shuh ha kaba ïa dei ban ai ki jingsumar ba biang tam ïa ki paidbah.
Ïa ka kynhun la ïalam u President u Bah Kenesjune L.Nonglait ha ryngkat ki dkhot.
Ha kane ka jingleit jurip, ka seng ka la ïohlad ban ïakren sani bha bad ka Medical Superintendent.
Ha ka jingïakren bad ki lad pathai khubor u Bah Kenesjune u la ong ba ka Civil Hospital Mawkyrwat ka dang don shibun ki jingduna kata naduh ki doktor kiba dei na ka bynta ban ai jingsumar ïa ka sniehdoh, ïa ki khmat, Medicine Specialist physicians, ki General Duty Medical ophisar. Wat ïa ki ïing ne ki jaka sah (Staff Quarter) jong ki nongtrei ruh kam pat don satia ha kaba ki nongtrei ha kane ka jaka ki hap ban sah wai ha ki ïing briew.
Ym tang kata, na ka bynta ka Maternal Child Wing (MCW) ruh kam pat don kumjuh ruh ka CT Scan kaba donkam tam ki tiar ba pyndonkam ha ICU, nangta ka Ultra Sound ruh dang don tang kawei bad kiwei de ki jing donkam. Namarkata, kane ma jaka sumar ka dang donkam shibun ban pynbiang ïa ki jingdonkam, ong u bah Kenesjune.
Ka seng namarkata, ka sngewdei ban kyrpad ïa ka sorkar jylla lyngba ka tnad ka koid ka khiah ban pynbiang lem ïa kine ki jingdonkam khnang ba ki nongpang kin ym donkam shuh ban leit shah sumar shabar na ka district hynrei tang hangne hapoh ka Civil Hospital Mawkyrwat ruh ka la biang bad kan long shisha ka jingmyntoi ïa ki paidbah jong ka thaiñ baroh kawei.