Pynbeit noh halor jingïakhih ka MCTODA, kyntu u Doloi bad ki Waheh Shnong ïa ka sorkar bad DC

By Mawphor Editor On Nov 11, 2025

Khliehriat Naiwieng 10 : Ki Waheh Shnong kiba napoh Elaka Narpuh mynta ka sngi hapoh ka jingïaam u Doloi ka Elaka Narpuh u Doloi Manbha Kyndoh ki la leit ïakynduh ïa u Deputy Commissioner, East Jaiñtia Hills District bad ki la kyntu jur ïa ka sorkar bad ki bor district jong ka East Jaintia Hills District ba kin shim khia ban pynbeit mardor halor ka mat ba ïadei bad ka jingiakhih jong ka Meghalaya Commercial Trucks Owners and Drivers Association (MCTODA) khnang ba nym shah ktah ka kamai kajih bad ong ruh ba kane ka jingiakhih ka dei kaba beaiñ.
Katkum ka dorkhas ba la buh ha u Deputy Commissioner ka East Jaiñtia Hills District, ba la soi kyrteng da u Doloi elaka Narpuh u Doloi Manbha Kyndoh bad shiphew ngut ki Waheh Shnong kiba na Narpuh ki la pynpaw ba kane ka jingiakhih jong ka MCTODA kaba la sdang naduh ka 27 tarik u bnai risaw kaba dang bteng haduh mynta ka la buh jingma ïa ka kamai kajih jong ki la bynrap ruh ba “Ha East Jaiñtia Hills District ki don 7-8 tylli ki karkhana dewbilat ha kaba haduh 2500-3000 ngut ki briew ba dei ki riew lum ki la trei ha ki karkhana dewbilat bad kiba la shu shaniah beit na ki karkhana ha kaba ïadei bad kaba pyndap ha ïing ha sem”
La ong ruh ba don ki briew kiba dei ki riew lum kiba shaniah ruh na ki company dewbilat ha kaba ïadei bad ka khaïi ka pateng jong ki da kaba ki ju kit jingkit ha ki company dewbilat, kumjuh ruh ki briew kiba na ka thaiñ Narpuh ki ju pynpoi mar kum u shyiap, ki maw ria, ki dieng sawdong bad ki siej sha ki company hynrei mynta la sangeh lut ki kam ki jam, ka dewbilat kaba ki ju ioh duna dor ruh mynta kim ioh shuh namar ki karkhana dewbilat ki la sangeh treikam bad kane ka la ktah ïa ki jingpyntrei ïa ki kam ba ki pyntrei ha ki shnong ki thaw.
“Kane ka jingshah khang ne ka strike ba pynlong da ka MCTODA mynta ka la kynjoh sha ka 15 sngi bad katkum ka jingioh jingtip baroh ki karkhana dewbilat ruh ki la sangeh treikam lut bad la shah ktah ruh ka kamai kajih jong ngi, katkum ka jingsngewthuh jong ngi bad katkum ka jingiaphylliew jingmut hapdeng ki waheh shnong kiba na elaka Narpuh,ym duna ïa ka 40-50 hajar ngut ki briew ba dei ki riew lum kiba la shah ktah ha kane ka jingpakhang ba beaiñ jong ka MCTODA kaba shah ktah ruh ïa ki briew jong ka thaiñ ba kynthup ruh naduh kiba bun ki longïing,ki nongñiah kali, ki nong bud kali, ki Dhaba kiba don ha rud surok kiba im ja na kiba ñiah trok.” la pynpaw shuh shuh ha ka dorkhas.
Nalor kitei ki jingshah ktah ba la kdew haneng, la ong ruh ba kane ka jingshah pakhang ki kali ka la ktah ruh ïa ki kam pynroi ha ka thaiñ kiba dang pyntrei mynta da ki company dewbilat na ki tnat CSR jong ki bad kane ka ktah ïa ka roi ka par ha ki shnong ki thaw, kane kan ktah ruh ïa ki skim pynroi kiba wan na ka District Mineral Funding (DMF) kaba na ka daw ka jingbym treikam ki karkhana dewbilat ha kaba pynmih ïa u dewbbilat.
“Phi tip ba ngi la jan ruh sha ka aiom lehkmen Chrismas bad ngi ki briew na ka thaiñ ngi donkam ban pynkhreh ïa kane ka aiom leh kmen, ngi sngew diaw namar ka jing shah ktah ha ka ioh ka kot kaba na ka daw ka jingiakhih ka MCTODA bad ki kynhun kiba kyrshan bad kane ka jingshah khang ki kali ne ka strike ka la ktah bha ïa ki riew lum kaba ym dei satia na ka daw ka jingbakla jong ngi bad ngi sngew ba lada ka sorkar bad ki bor synshar district kim shimkhia ban pynbeit ïa kane ka mat yn sa nang shah ktah shuh shuh ki briew jong ka thaiñ” la bynrap ha ka jingthoh ne ka dorkhas ba la soi da u Doloi lem bad ki Waheh Shnong.
Ki Waheh Shnong kiba napoh Elaka Narpuh kiba la ia soi ia ka dorkhas ki kynthup u bah Lasting Pala, bah K.Tongper, Wandiangmon Lamin, F.Nongtdu, Stanly Masar, Stingson Sianghsai, bah Biangjop Suting, bah Phaibiang Syrti, bahut Sunny Bareh bad u bah Marlei Rymbai.
Ïa ka dorkhas la phah copy ruh sha mantri rangbah ka jylla, u Conrad Sangma, sha ki Symbud Myntri Rangbah, bah Prestone Tyngsong bad bah Sniawbhalang Dhar, sha ka MLA Sutnga Saipung ka kong Santa Mary Shylla, sha u MLA khliehriat bah Kyrmen Shylla, sha u Superintendent of Police EJHD u Vikash Kumar bad sha ki pathai khubor.