Shillong, Jylliew 17 : Ka ïing bishar High Court jongka jylla mynta ka Sngi Thohdieng ka la bthah ïa ka sorkar jylla ban ym ailad ban ïaleh politik halor ki ñiut ki ñier ha sor Jowai hynrei ban thaw lad thaw lynti ban pynïoh noh kloi ïaka jaka ban bret ñiut na ka bynta ka sor Jowai kaba dei ka nongbah jong ka West Jaintia Hills District.
“ Ka sorkar ka dei ban kham shim khia ban rat ïa ki jingïaleh politik bad pynbeit noh ïa kane ka jingeh kaba la sahteng ha katei ka nongbah” ong ki nongbishar u Chief Justice Sanjib Banerjee bad Justice W.Diengdoh haba shim bishar ïaka mukotduma PIL ba la ujor da ka Synjuk Ki Waheh Chnong Jowai.
Ka ïing bishar ka la pynpaw watla la kham i biang mynta ïa kane ka kam hynrei kane kam dei pat ka ban ïaineh junom. Ka ïing bishar ka ïohi ba ka don ka jingïaleh politik ha kane ka kam ba sa mih ki kynrum kynram bad jingkhanglad ban ïoh ïaka jaka. Ka kyrmen ba kan don ka jingkylla bamut ha kito ki briew kiba pyrshang ban pynwit bad pynthut ia ka jingpynbeit ïa kane ka kam.
Hooid na ka liang ka Jowai Municipal Board ka la pynpaw ba ka jingkit ïaki ñiut ka long man la ka sngi bad ka la don ka jaka na ka bynta ban bret shipor. Ka jingbishar biang ïa kane ka mukotduma kan long haka 15 tarik Naitung 2022.
