Pynbeit ka Penshon & Provident Fund Adalat ïa ka jingpeit kyrpang hapoh ka Audit Week 2025

Shillong, Nohprah 06 : Kum shi bynta ka Audit Week 2025 Outreach Programme, la pynlong ïa ka Pension & Provident Fund Adalat ha ka Ophis jong u Principal Accountant General (Audit & Entitlement), Meghalaya, kaba long ka sienjam kaba kongsan ban pynbeit ïa ki case ba la sahteng slem ba ïadei bad ka bai bam tymmen bad ka provident fund kaba la ktah ïa bun ki briew ha kylleng ki jylla. Ka Adalat ka long kum ka rynsan na ka bynta ki Drawing & Disbursing Officer (DDO), ki nongmihkhmat jong ki tnad bad ki ophisar jong ki distrik ban ïatreilang ban weng ïa ki jingpynslem ba ryntih kiba khanglad ïa ka jingpynbeit ha ka por ïa ki jingkam ïa ka provident fund.
U L. Hangsing, Principal Accountant General (A&E), Meghalaya, uba la plie ïa ka Adalat, u la ban jur ïa ka jingdonkam jong kane ka sienjam. “Ngi dei ban pyndonkam ïa kane ka rynsan ban pynkhuid ïa baroh ki case ba dang sahteng jong ka bai bam tymmen bad ka provident fund bad ban pynthikna ba ym don uwei ruh u nongïoh jingmyntoi uba hap ban ap ïa ki hok jong ki,” u la ong. U la pyntip sha ki nongïashim bynta ba ka rukom thep online na ka bynta ka bai bam tymmen bad ki case GPF ka dang don ha ka jingpynkhreh, ha kaba ki bor ba dei khmih mynta ki lah ban ai lyngba ka e-Pension, ki rynsanl e-GPF bad ka Digi Locker na ka bynta ki nongïoh jingmyntoi.
Ka sienjam ka ban jur ïa ka jingkut jingmut jong ka sorkar ban pynthikna ïa ka jingpynbeit ha ka por kaba biang bad kaba shai ïa ki hok jong ki nongïoh jingmyntoi. Ka Adalat ka la ithuh ïa kiwei pat ki mat kiba kongsan kynthup ïa ka jingbymïahap kyrteng, ki jingbakla ha ki kot ki sla bad ka jingpynslem kaba jur ha ka jingphah ïa ki case GPF da ki DDO bad ki Khlieh jong ki Tnad, kaba la wanrah jingeh ïa ki nongshim bynta kiba shaniah ha kine ki pisa ba dei ban ïoh hadien ba la shongthait.
Ha kane ka jingïalang, la lah ban pynbeit ïa bun ki case kiba la slem bha ba ïadei bad ka provident fund lyngba ka jingïatreilang hapdeng ki ophisar bad ki nongmihkhmat jong ki tnad. Ki nongmihkhmat na ki tnad kam pohïing, Social Welfare, PWG (Buildings), Sericulture bad tnad ka koit ka khiah ki la ïashim bynta shitrhem bad ki la kular ban pynbiang kloi ïa ki kot ki sla kiba donkam khnang ban lah ban pynbeit kloi ïa ki case kiba dang sahteng.
Ka Adalat ka la kut da ka jingkular kaba thymmai ban pynsted ïa ki jingpynbeit ïa ki case kiba dang sahteng. U Rupak Saha u la pdiang sngewbha ïa ki nongïashim bynta, katba u Ratul Chandra Borah u la ai ïa ka jingai khublei, da kaba ban jur ïa ka jingpynlong man ka por ïa kum kine ki rynsan na ka bynta ka bha ka miat jong ki nongïoh jingmyntoi.
Ki ophisar na ki ophis bapher bapher jong ka district ba kynthup ïa u Deputy Commissioner Ri-Bhoi, u Superintendent of Police na Ri-Bhoi bad East Khasi Hills, u ophisar jong ka District Sericulture na West Khasi Hills, Executive Engineer (Roads) Nongpoh, Block Development Officer) Umling, Director jong ka Tnad Social Welfare, Chief Engineer PWD (Buildings) Shillong, bad District Medical & Health Officer West Khasi Hills Nongstoiñ ki la ïadonlang bad ki la ïashim bynta ha ki jingïakren.