Nongstoiñ, Rymphang, 20: U Superintendent of Police jong ka West Khasi Hills District, u la pyntip ba khnang ban ym wit ka ïaid ka ieng ïa ki kali bad ki ophisar kiba rah ïa ki EVM machine ha ka sngi thep vote ha ka office jong u District Election Officer (DEO) DC office Nongstoiñ, la pynlong One Way ïa baroh ki kali kiba ïaid na Ladweitang (Indoor Stadium) sha DC office bad khlieh iew.
Ki kali kiba poi ha ka Gate ba ha khmat DC office kin ïaid sha surok PWD (quarter) ban poi sha IDBI Bank marjan ka petrol pump NRL main road. Yn ym shah ïa ki kali ban rung na IDBI Bank NRL petrol pump sha Gate DC office, nangta khlieh iew sha DC office lane Ladweitang (Indoor Stadium).
Yn khang ïa ka lynti ïaid kjat na khlieh iew sha DC office, yn shah ban pynieng kali shilliang ka rud surok na Indoor Stadium sha khlieh iew tang ïa ki kali Sorkar, ki Counting officials bad ki Counting agents. Kane ka jingpynbeit kan treikam mardor naduh ka 5 baje mynstep haduh ban da wan phai ki EVM machine ha ka 21 tarik u Rymphang 2025.
