Nongstoiñ, Rymphang, 21: U Superintendent of Police jong ka West Khasi Hills District, u la pyntip ba khnang ban ym wit ka ïaid ka ieng jong ki kali ki paidbah bad ban ym wanrah kano kano ka jingthut ha ka sngi ñiew vote ha ka office jong u District Election Officer (DEO) DC office Nongstoiñ, la pynlong One Way ïa baroh ki kali kiba ïaid na Ladweitang (Indoor Stadium) sha DC office bad khlieh iew.
Yn ym shah rung ïa ki kali na khlieh iew sha DC office lane Ladweitang (Indoor Stadium). Yn khang ïa ka lynti ïaid kjat na khlieh iew sha DC office, yn shah ban pynieng kali shilliang ka rud surok na Indoor Stadium sha khlieh iew tang ïa ki kali Sorkar, ki Counting officials bad ki Counting agent. Kane ka jingpynbeit kan treikam mardor naduh ka 5 baje mynstep haduh ban da dep ñiew ïa ki vote ha ka 24 tarik u Rymphang 2025.
