Pynap lypa ka VPP da ka jingïakhih lada ka sorkar ka dang pynslem ban pynbna ïa ka kaiphod RP

Shillong, Nohprah 18: U President ka Voice of the People’s Party (VPP) u Bah Ardent Miller Basaiawmoit bad u MLA ka liang pyrshah na Nongkrem Constituency u la ong ba ka long kaba sngewsih ba mynta ki la ïaid haduh 6 bnai ba ka sorkar jylla haduh mynta kam pat shym la pynpaw ne pynbna paidbah ïa ka kaiphod jong ka Expert Committee halor ka Reservation Policy (RP) bad lada ka dang pynslem ka seng ban pynlong biang da ka jingïakhih.
Lyngba ka kyrwoh khubor lyngba ka video kaba la pynlait ha ka sngi Palei u President ka VPP u la ong ba ka seng ka phah ïa ka khubor kaba shai sha ka sorkar ba lada ka kam pynlait ïa kane ka kaiphod kan pynlong bad pynbor ïa ka seng ba kan pynlong biang ki jingïakhih ban pynbor ïa ka sorkar ba kan sei madan ïa kane ka kaiphod bad ba kadei ban pynbna paibah ïa ka.
“Kane kadei ka khubor sha u Myntri Rangbah ka jylla u Conrad Sangma ba 6 tylli ki bnai ki la ïaid naduh ba ka Expert Committee ka la aiti ïa ka kaiphod sha ka sorkar halor ka mat pynkylla ne ban bishar kam ïa ka bhah thungkam thungjam jong ka jylla bad wat hadien ba ka party ka la ïai pynkynmaw la bunsien ïa ka sorkar ba dei ban pynbna paidbah noh ïa kane ka kaiphod bad lada ka sorkar ka dang ïai pynslem, ka party kan hap ban shim ïa ka sienjam ban pynlong da ka jingïakhih paidbah sa shisien pat ha kine ki khyndiat sngi khyndiat por ki ban wan,” ong u President ka VPP.
Ka expert committee, ba la khlieh da u Justice (Retd) Mool Chand Garg, la seng ha u Nailur u snem 2023 ban bishar biang ïa ka bhah thungkam thungjam jong u snem 1972. Ia kane ka kaiphod la aiti sha ka sorkar ha u bnai Jylliew u snem 2025, hynrei la pynslem pat ban pynlait ïa ka kaiphod ha kaba kane ka la wanrah ka jingsngewkhia halor ka jingkhuid jingsuba halor ki kam thaw aiñ.
Lah ban pynkynmaw ba dang shen u Myntri Rangbah u Conrad K Sangma kham ha shwa u la ong ba ïa ka kaiphod yn sa pynlait hadien ba la ïoh ka jingmynjur na ka kynhun Myntri sorkar hynrei kam shym la don pat ka por kaba thikna kaba la pynpaw da ka sorkar.