Pylleiñ don khyrdop ka tnad Forest, ïaid laitlan ki Trok kit mawria ba wan na ki kor tylliat ha Maikhuli

Nongpoh, Lber 23: Wat la ka sorkar Meghalaya ka la buh ïa ka khyrdop khrong khajna ha ka shnong Khappud ba hap ha u pud u sam ka Shnong Maikhuli ban talasi ne tohkit ïa ki Kali kit maw na ki par maw bad ki stone crusher kiba don ha katei ka shnong khappud, hynrei kane kam shym la sei soh ha kaba ki Kali kit mawria kim shym siew satia ïa ka khajna bad ki ïaid laitlut na katei ka khyrdop kaba don ha ka Shnong Maikhuli, ka shnong khappud ka Meghalaya bad ka Assam.
Ïa kane ka la pynpaw da kiba bun ki nongshalan mawria ha Ri Bhoi ha kaba ha Killing ki hap ban siew thik thik ïa ka khajna ha ka tnad Forest katkum ba la buh da ka sorkar bad ha katei ka jaka pat kaba don ha Maikhuli ki trok kit shyiap bad khyndew kim siew satia bad kim ieng hi ruh wat hadien ba poi ha katei ka khyrdop ba la buh da ka tnad Forest.
Dei halor ka jingpyn paw jingeh ki nongshalan mawria kiba la pynpaw ba kumno kin siew tang ma ki ïa ka khajna sha ka sorkar bad katba ki Kali dumper kiba kit mawria na ka Stone Crusher kaba don ha Mawikhuli kim siew satia ïa ka khajna sha ka sorkar bad kim sangeh hi ruh ha katei ka khyrdop ba la buh da ka sorkar ha Maikhli.
La sakhi ruh halor kane ka jingkynnoh ba ka long kaba shisha ka dei hadien ba la leit ban jurip ha katei ka jaka bad kumba la pynpaw da ki nongshalan mawria kiba sngewkhia halor kane ka bynta la lap shisha ba ki trok kit mawria kiba wan na kawei ka jaka tylliat maw kaba don ha Maikhuli kim siew satia ïa ka khajna ha ka khyrdop ka tnad Forest kaba don ha Maikhuli bad tang shu poi ha katei ka khyrdop khlem sangeh ki ïaid beit bad nalor kata ki la kit tam pud.
Ka tylllong khubor ba la ioh ban ïa kren ki la pynpaw ba kane ka long kaba shisha ha kaba ki trok kit mawria (20 mm Chip) kim shah tohkit ha katei ka tnad Forest bad wat ki nongtrei ka tnad Forest ruh kim lah ban leh ei ei namar ba don kiba btah bay m dei ban pynsangeh ïa ki kali kit mawria ha katei ka khyrdop bad kim dei ruh ban shim ïa ka khajna.
Haba kren halor kane ka jingleh mon ki trok ki mawria khlem da siew khajna kaba mut la shu shalan beain ïa u mawria sha Assam ka dei na kawei ka Stone Quarry kaba pynmih mawria bad kaba don ha katei ka shnong Maikhuli kaba hap ha ka jylla Meghalaya.
Kumba la pyntip da kito ki nongshalan kiba la pynpaw ka jingsngewkhia halor kane ka bynta, la ong ba ia katei ka Stone Crusher kaba don ha Maikhuli la pynïaid da uwei u bar jylla ba la tip kum u Abinaw Surekam bad ki trok dumper kiba kit mawria na katei ka stone crusher kim ju siew khajna ha katei ka khyrdop ba la buh da ka tnad forest ban talasi ne tohkit ia ki trok ba shalan beain naduh u maw, khyndew, syiap bad mawria.
Haba wad jingtip bha sha ki shnong khappud ba don ki par maw bad ki kot tylliat maw kiba bun ki shnong ha khappud ka Meghalaya bad ka Assam ka sorkar jylla ka duhnong ha ka liang ka khajna bad ka daw hi ka long ba ym don ka jingpyrkhing na ka liang ka sorkar Meghalaya, kane ka long ruh katkum ka tyllong khubor ba la ioh lum da u Nongthoh Khubor.