Pyllait u VC ka CAU ïa ka Mushroom Mobile Apllication App, ka App kaba hikai shaphang ka rukom rep tit
Nongpoh, Naitung 12: Ban tip kham bha shaphang ka kam rep Tit bad ruh ban ai jingmyntoi ïa kito ki nongrep kiba ju rep Tit, u Dr. Anupam Mishra, Vice Chancellor ka Central Agricultural University, Imphal kum u kongsan ha ka 10 tarik u Naitung 2025 u la leit ban plie paidbah ïa kawei App ba la tip kum ka ‘Mushroom Mentor Mobile Application App’ ba la pynlong ha ka College of Postgraduate Studies in Agriculture Science (CAU), Umiam.
La ai kyrteng kyrpang ruh ïa kane ka App da ka ‘Mushroom Mentor’ ha kaba la saindur kyrpang da ka College of Postgraduate Studies in Agriculture Science, Umiam bad ka National Institute of Technology (NIT), Meghalaya, ha kaba lyngba kane ka App kin ai ka jinghikai halor ka kam rep Tit bad ki kam wad bniah ïa ka kam rep Tit ha kaba ïa ka jingwan bniah ïa kane ka kam rep Tit la leh da ka College of Postgraduate Studies in Agriculture Science, CAU, Umiam.
Ïa kane ka App lah ban ioh na Amazon bad Google Play Store bad kane ïa kane ka App la shna ne saindur ha ka jingïalam u Prof. Dwipendra Thakuria, Dean, CPGSAS, Umiam.
Kumba la pynpaw, kane ka App, ka dei ka App kaba dei ka jingwad bniah shaphang ka kam rep Tit, ki jingpynmih ïa ki Tit ban pyndonkam da ki buit stad ba mynta, ka jingwad jingtip shaphang ki jingtei met jong ki Tit, ki lad jingïarap ba lah ban ioh na ka sorkar, ka rukom shet ïa ki Tit bad ruh ban tip bniah shaphang ki jaid Tit bapher bapher da kaba peit ïa ki dur jong ki Tit.
Ka jinglah ban pynurlong ban shna ïa kane ka App ka dei ruh lyngba ka jingtrei shitom bad ka jingwad bniah ka Ms. Bhanita Baruah, kaba dei ka PhD Scholar ha ka jingïalam u Dr. L. Devrani, Professor, CPGSAS, Umiam, Dr. PNM Rani, Assistant Professor (Computer Science), CPGSAS, Umiam bad Dr. Bunil kumar Balabantary, Assistant Professor, NIT, Meghalaya.
Kiwei kiwei kiba la ïa don lang ha kane ka sngi ba la pynlait paidbah ïa kane ka App ki kynthup ïa u u Prof. P. Mahanta, Director, NIT, Meghalaya; Prof. Ram Singh, Dean, College of Agriculture, Kyrdemkullai; Dr. B. Balabantary, Assistant Professor, NIT, Meghalaya; Shri. Kitborlang Kharpran, Assistant Director of Horticulture, Mushroom Development Centre, Upper Shillong, ki samla pule bad kiwei kiwei de.