Pyllait u PM ïa lai tylli ki kot halor ka jingim bad jingïaid lynti jong u Vice President barim, M. Venkaiah Naidu

Shillong, Naitung 03: U Myntri Rangbah duh, Narendra Modi u la pyllait lai tylli ki kot halor ka jingim bad ka jingïaid lynti jong u Vice President barim jong ka ri, u M. Venkaiah Naidu shi sngi hashuwa ka sngikha ba 75 jong u lyngba ka video conferencing mynta ka sngi.
Ki kot ba la pyllait da u Myntri Rangbah duh kilong (i) ka Biography shaphang u Vice President barim ba la tip kum ka “Venkaiah Naidu – Life in Service” ba la thoh da u S Nagesh Kumar, Resident Editor barim jong ka The Hindu, Hyderabad edition; (ii) “Celebrating Bharat – The Mission and Messageof Shri M Venkaiah Naidu as 13th Vice–President of Indïa”, ka Photo chronicle ba la pynbitpynbïang da u Dr I.V. SubbaRao, Secretary barim sha u Vice-President of Indïa; bad kaba (iii) ka Pictorïal biography ha ka
Telegu ba la tip kum ka “Mahaneta – Life and Journey of Shri M. Venkaiah Naidu” ba la thoh da u Sanjay Kishore.
Ha ka jingai jingkren ha ka jingïalang, u Myntri Rangbah duh u la ong ba u M. Venkaiah Naidu un sa dap 75 snem lashai ka sngi ka 1 tarik Naitung bad u la ong, “Kine ki 75 snem ki la long kiba kyrpang bad ka kynthup ïa ki mawmer ba khraw” U Myntri Rangbah duh u la pynpaw ka jingkmen ban pyllait paidbah ïa ka biography shaphang u M. Venkaiah Naidu bad artylli kiwei ki kot kiba long halor ka jingim jong u.
U la pynpaw ka jingsngewskhem ba kine ki kot kin long ka tyllong ai mynsiem ïa ki briew katba ka pynshai ruh ïa ka lynti kaba dei sha ka ai jingshakri ïa ka ri.Haba kynmawïa ka jingïadei kaba la slem jong u bad u Vice-President barim, u Myntri Rangbah duh u la ong ba u la ïoh lad ban ïatreilang bad u Venkaiah ji la kham slem.
Kane ka jingïatreilang ka la sdang ha ka samoi treikam jong u Venkaiah ji kum u national president jong ka Bharatiya Janata Party (BJP), bud sa ka bynta ba kongsan ha kaba u la long u Myntri ha ka Kynhun Myntri, ka samoi treikam jong u kum u Vice-President jong ka ri, bad hadien kum u Shongknor jong ka iingdorbar thawain Rajya Sabha.
“Ym lah ban pyrkhat ïa ka jingkhraw ka jingshemphang kaba u briew uba na ka shnong kaba rit u la ïoh da kaba bat ïa ki kam kiba kongsan. Nga la ïoh jinghikai shibun na u Venkaiahji,” u la bynrap.
U Modi u la pynpaw ba ka jingim jong u Venkaiah Naidu ji kalong ka dak kaba paka jong ka jingpynïasoh ïa ki jingthmu, ka thong bad ka jinglong. U Myntri Rangbah duh u la pynpaw ka jingkmen shaphang ka jinglong ka BJP bad ka Jana Sangh mynta ha Andhra Pradesh bad Telangana haba ïanujor bad ki phew snem ba la leit khlem kano kano ka nongrim kaba skhem.
U la ong ba “Hapdeng kum kane ka jingeh, u Naidu u la trei borbah kum u ABVP Karyakarta da ka thong jong ka “Ri Nyngkong” bad u la rai ban leh ei ei na ka bynta ka ri.” U Myntri Rangbah duh u la ïaroh ïa u Naidu uba la ïakhun tyngeh pyrshah ïa ka Emergency, kaba la pyntreikam 50 snem mynshuwa ha ka ri, wat hapdeng ka jingshah set phatok kumba 17 bnai.
U Modi u la ong ba u Naidu u la long uwei na ki riewshlur uba la shah tynjuh ha ka por jong ka Emergency bad dei na kata ka daw ba u shim ïa u Naidu ji kum u paralok ba shisha.
Haba ong ba ka bor kam pyni ïa ka jingsuk jong ka jingim hynrei kadei ka rynsan ban kot sha ki jingkut jingmut lyngba ka jingshakri, u Myntri Rangbah duh u la ong ba u Naidu u la pynshisha ïalade haba u la ïoh lad ban don bynta bad ka sorkar jong u Vajpayee ha kaba u la jied ban long u Myntri Sorkar Pdeng ba dei khmih ïa ka Tnat Rural Development. U “Naidu ji u la kwah ban ai ka jingshakri ïa ki shnong ki thaw, ki briew kiba duk bad ki nongrep,” la bynrap u Modi.
U la ong shuh shuh ba u Naidu u la trei kum u Myntri Sorkar Pdeng ba dei khmih ïa ka Tnat Rural Development ha ka sorkar Modi bad u la ïaroh ïa ka jingkut jingmut jong u bad ka thong na ka bynta ki nongbah jong ka ri kiba katkum ka juk mynta. U la kren shaphang ka Swachh Bharat Mission, Smart City Mission bad ka Amrit Yojna ba la sdang da u Venkaiah Naidu.Haba ïaroh ïa ka jinglong jai jai jong u Vice President ba rim, u Myntri Rangbah duh u la kynmaw ba ym don ba lah ban kot bad ka kyrdan jingstad, ka jingstet pyrkhat, ki jubab ba kloi bad ki kyntien jong u Venkaiah Naidu.
U Modi u la kynmaw ïa ka slogan ba la wanrah da u Naidu ha ka jingthaw ïa ka sorkar synrop lang jong u Atal Bihari Vajpayee, “Ek haath mein BJP ka jhanda, aur dusre haath mein NDA ka agenda”, kaba ka jingmut kalong ba ka lama jong ka party ha kawei ka kti bad ka agenda jong ka National Democratic Allïance ha kawei pat ka kti. Ha u 2014, u la wanrah ïa ka jingong ‘Making of Developed Indïa’ na ka bynta ka M.O.D.I. U Myntri Rangbah duh u la ong ba u dap da ka jinglyngngoh ïa ki jingkren jong u Venkaiahji, kaba la pynlong ïa u ban ïaroh ïa ka jinglong jong u ha Rajya Sabha shisien haba u la ong ba ka don ka jingmut, ka jingshisha, ka jingshemphang, ka jingsngewtynnad bad ka jingstad ha ki kyntien jong u Vice President ba rim.U Myntri Rangbah duh u la ïaroh ïa ka jinglong kaba la wanrah da u Naidu ha ka samoi treikam jong u kum u Shongknor jong ka Rajya Sabha bad u la kren shaphang ki rai bapher bapher ba la shim da ka iingdorbar thawain.
U la kynmaw ïa ka jingwanrah ïa ka bill ban weng ïa ka Article 370 ha Rajya Sabha hashuwa ban wanrah sha ka iingdorbar thawain Lok Sabha, u Myntri Rangbah duh u la ïaroh ïa ka jingshemphang ha ka jinglong nongïalam jong u Naidu ha ka jingmynjur ïa kum kane ka bill kaba kham
pher da kaba pynthikna ïa ka burom jong ka iing dorbar thawain. U Myntri Rangbah duh u la kitbok kitrwïang ïa ka jingim kaba jrong bad kaba koit ba khïah ïa u Naidu.
U Modi u la kren shaphang ka jinglong lung mynsiem jong u Venkaiahji bad u la pyntip ba um ju ailad ba ki jingïapher kin ktah ïa ka jingshim rai jong u.