Shillong, Risaw 01: Ka GREEN lane ka Grassroot level Response Towards Ecosystem Enhancement and Nurturing ka dei ka nongrim halor ka phang jong ka Payment for Ecosystem (PES), kaba kyrshan ïa ki shnong, ki Kur lane ki riew shimet kaba buh ka thong ban pynneh bad ïada ïa ki khlaw ki btap la kumno kumno haduh 30 snem.
Haba kren ha kane ka sngi, u Myntri Rangbah u Conrad K. Sangma u la ong, “Ka long kaba myntoi ïa ki paidbah, ka imlang sahlang bad ka pyrthei ba ka PES programme dei ban shim kum ka national bad ka international scale. Kadei ka jingdonkam jong ka por. To ngin ïada ïa ki khlaw ha shwa ba kin jot naba lada ki la jot yn ym lah shuh ban tei biang. Kumta kane ka Green Meghalaya ka dei ban pynjyrngam bad ngi sngew sarong halor kane ka flagship programme. Kumta ngi kwah ban ïaid shakhmat halor kane ka ‘Green Meghalaya Plus’, kaba dei ka prokram kaba kongsan.”
Kawei na ki jingkylla ba kongsan ha ka PES 2.0 guidelines ka dei ban kyntiew ïa ki jaka na ka bynta kiba ïashim bynta ha ki prokram. Ha kaba ka skhim kaba mynshwa ka donkam kumba 2 hectare ka jaka ba long khlaw, bad mynta ki guidelines ba thymmai ka la pynduna sha ka 1 hectare, kaba shah ïa ki trai khyndew kiba rit ban pyndonkam
“Kam dei tang ka sawdong sawkun kaba ngi ïakren hangne. Ka jingïada ïa ki khlaw ka long kaba kongsan na ka bynta jong ngi wat hapdeng ka kam pisa pilaiñ. Katba ngi dang ai pisa ban ïada, ban pynneh ïa ki khlaw, ka long pat kaba shai ba ka long ka jingmyntoi na ka bynta jong manla uwei pa uwei,” u la bynrap.
Ha ka prokram u Myntri Rangbah u la ïasyllok bad ki nongïoh myntoi jong ka GREEN Meghalaya+, CM ELEVATE, bad FOCUS.
Ha ka prokram ka la don ka jingsam ïa ki cheque bad ki shithi ba la mang sha ki nongïoh myntoi jong ka FOCUS, CM-Elevate, bad GREEN Meghalaya+.
Lah ban ong ba ka CM-ELEVATE Phases 1 bad 2 ka la ai jingmyntoi ïa kumba 2,281 ngut ki riew shimet kaba la kot sha ka T. 60 klur, katba ka FOCUS’s kaba ar ka thmu ban ai ka jingkyrshan ïa kumba 3,777 ngut kiba ïoh myntoi da ka jinglut kaba long T. 17.59 klur.
