Shillong, Jylliew 27: U Myntri Rangbah ka Jylla u Conrad K Sangma, ha ka sngi Palei ula pyllait paidbah ïa ka Chief Minister’s Research Grant (CMRG) ban pynshlur bad ban kyntiew ïa ki kam wadbniah (Research) hapoh ka Jylla.
Ïa ka CMRG la pyllait ha ka jingïalang kaba long ha Meghalaya Secretariat ha ka jingïadonlang u Myntri ka Tnat Arts & Culture ka Jylla u Bah Paul Lyngdoh bad kiwei kiwei.
Ka jingthmu jong ka CMRG ka long ban pynshlur ïa ki kam wadbniah ha ki bynta bapher bapher ba kynthup ïa ka Arts & Culture, ki Jaitbynriew riewlum trai Jylla, ka Ktien ka Thylliej, ka jinghiar pateng, ki jingtei sahnam uba rim bad kiwei kiwei. Man kawei pa kawei ka project kin ïoh ïa ka song pisa ba T. 3 lak ban pyndep hapoh ka 10 bnai.
La ong ba Ïa ki aplikeshon ban ïoh ïa ka grant yn pynkut ha ka shiteng miet jong ka 20 tarik Naitung, 2024. Ki scholar kiba shah jied kin sa ïoh ktien hapoh ka taïew ba-ar jong u Nailar, 2024, bad ïa ka instalment ba nyngkong jong ka grant yn pyllait ha ka 15 tarik Nailar 2024. Ki scholar kiba kwah ban aplai ki lah ban phah ïa ki kyrteng online lyngba ka website ka Sorkar, ka Tnad Arts & Culture bad ka Tnad Social Media Handles.
Ka rukom jied ka kynthup ïa ka jingbishar bniah da ka CMRG Committee, bud da ka personal interview ka ban long ha Shillong. Ki kyrtong ba shah jied ki dei ban pyni bad batai ïa ki rukom leh ïa ka jingwadbniah. Ïa ka thup jong ki kyrtong ba shah jied yn sa pynmih online.
Ïa ka grant yn pyllait ha ki lai bynta. Ka bynta ba nyngkong (50%) yn pyllait hadien ba pyndep lut ïa ki jingdonkam baroh kiba donkam. Ïa ka bynta kaba ar (25%) yn ai hadien ba kila aiti ïa ka progress report kaba bniah hadien hynñiew bnai. Ka bynta kaba lai (25%) yn pyllait hadien ba la aiti ïa ka Executive Summary, Final Report bad ka Final Statement of Account. Ka jingbym lah ban aiti ïa kine ki kot ki sla hapoh ka por ba la buh kan donkam ïa ki kyrtong ba kin pynphai noh ïa baroh ka grant.
Ka Final Research Project kan dei ka nongkynti jong ka Sorkar Meghalaya ha ryngkat ka jingai jingithuh ba ki ïoh jingkyrshan na ka CMRG. Ki kyrtong ba shah jied la pynshlur ruh ba kin pynmih ïa ki Research jong ki ha ka UGC Care List Journals da ka jingai jingmynjur.
Haba kren haba pyllait ïa ka CMRG, u Myntri Rangbah u Conrad K Sangma ula ban jur ïa ka jingkongsan ki jingwad bniah bad jingbuh jingthoh. Ula ong, “Ngi don ka jingsngew ba ngi duna bha ka jingbuh jingthoh bad ka jingwadbniah. Ka jingwad bniah ba da leh thikna bad ka jingbuh jingthoh ki dei ki mawbyrsiew ïa kiba bun ki kam pynroi. Kane ka sienjam ka thmu ban kyrshan ïa ki scholar bad ki nongwad bniah kiba angnud ban synniang hynrei ki bym don ïa ki nongkyrshan”.
Ula bynrap, “Ngi ïohi ba kane ka jingwad bniah kan dei ka jingai pateng ïa ka jingnang jingtip ka ban ai jingmyntoi ïa ki pateng ki ban wan. Ka jingthmu jong ngi ka long ban nang pynheh ïa kane ka prokram katba nang ïaid ka por. Ngi kwah ban sdang da kaba rit, shemphang na ki bad sa nang pynheh”.
U Myntri Rangbah ula kyntu ïa ki Scholar ba kin aplai ïa kane ka grant bad ong, “Kane ka prokram ka dei kaba mang ïa phi. Lada phim aplai, kan shu sepei kai noh. Ngi long kiba kloi ban nang pynheh ïa ka song pisa lada donkam. Nga ai khublei ïa baroh kiba don bynta ha kaban pynlong ïa ka jingpyllait ïa kane ka prokram kaba jop bad nga phaikhmat ban ïohi ïa ki jingmyntoi ki ban wan hapoh ka Jylla jong ngi”.
