Mawthadraishan, Naitung, 20: Na ka bynta ban pynkharoi biang ïa ki dohkha ha ka pung kaba don sha phang mihngi jong u kliar lum Mawthad-raishan, kaba dang hap hapoh u pud u sam jong ka shnong Lawdisai, ki trai jong katei ka jaka bad ka pung ba kynthup ïa u bah Aiborlang Syiem Shangoi bad u bah Beldingstone Lyngdoh Nonglait ryngkat kiwei pat ki para nongshong shnong, ki la leit ban pyllait symbai dohkha biang ha katei ka pung.
U bah Beldingstone Lyngdoh Nonglait haba ïakren bad u nongthoh khubor, hadien ba ki la dep pyllait ïa ki symbai dohkha, u la ong ba ka jingpyllait ïa kitei ki dohkha ka long ban pynthikna la katei ka um ka dang long bih ne kam long bih shuh, namar hadien katto katne sngi kin sa wan peit biang bad lada lap ba ki dohkha ki dang ïap kata ka mut ba katei ka um kam pat long ban dih.
U la ong ruh ba ka jingdon jong katei ka pung ha katei ka ka kylla long ka tyllong um ïa ki bun phew tylli ki shnong naduh Mawkhmahrang, Domkseh, Mawkyllei, Mawroh, Tieh-nongbah, Lawbyrtun, Nongshilong, Maw-kohngei, Umkrem, Umdum bad kiwei kiwei.
Nalor kata u la ong ruh ba ka jingleit buh symbai dohkha ka dei hadien ba u slap u ba jur u la ther ha kine ki taïew ba la dep bad ka um ka la shlei ha baroh arliang jong ka pung. Lehse ka dawai bih ba leit bret da ki runar, kam don shuh kumta kin sa pyntip sha baroh ki shnong kiba ring um bam um dih na katei ka jaka ba kin pyndonkam.
U bah Nonglait u la ong ruh ba sawdong katei ka pung, ki don ki khlaw bad na ka liang jong u bad ki para ba ïadon bynta lang ha kaba peit bad sumar ïa katei ka jaka, ki la khang pyrshah ruh ban pynïap pathar ïa ki mrad lada ki don bad ban siat ïa ki sim ki doh kiba don ha kitei ki khlaw. Ki la maham ruh ba ym bit ban pynjot pathar ïa ki jingitynnad jong ka mariang ha ki sawdong sawkun jong katei ka jaka.
